Gara e Monzas për Çmimin e Madh të Italisë ishte një zhgënjim për skuderinë Ferrari, e cila nuk arrit të fitonte në “shtëpinë” e saj. Por padyshim dështimi më i madh në këtë sfidë ishte piloti gjerman Sebasdtian Vettel. Ai u përfshi në një aksident me Hamilton që në xhiron e parë dhe si rrjedhojë u fut në bokse duke u nisur më pas i fundit. Vettel e mbylli garën i katërti por humbi shumë terren me pilotin anglez të Mercedes i cili tashmë e sheh veten 30 pikë para gjermanit.
“U përpoqa ta parakaloj Kimin në start, por nuk ia dola mbanë. Aksidenti? Nuk kisha hapësirë, asi Lewis nuk më la vend. Ai e kaloi pa shumë dëmtime, ndërsa unë nuk pata fat. Fat i keq.
U përpoqa të jap gjithçka për skuadrën time, por vendi i katërt është një rezultat zhgënjyes, duke parë se niseshim nga vija e parë me të dyja makinat dhe synonim fitoren. Edhe Kimi nuk pati fat në xhirot e fundit, pasi gomat e tij u degraduan shpejt dhe nuk pati mundësi të duelonte me Lewis për fitore. Titulli? Mund të shkonte edhe më keq se kaq, pasi që në xhiron e parë isha i fundit. Ka akoma gara dhe gjithçka mund të ndodhë. Tani garojmë në Azi, janë pistat tona, ndaj duhet të fitojmë”, tha Vettel.
