Juventus bën detyrën përballë Lazios duke e mposhtur me rezultatin e pastër 2-0 në “Allianz Stadio”. Por lajmi i keq për bardhezinjt është se akoma nuk kanë shijuar golin e Cristiano Ronaldos. Pjanic në pjesën e parë dhe Mandzukic në të dytën i dhanë fitoren Juvëntusit në ndeshjen e parë të luajtur në shtëpi. Juventusi ka marrë kryesimin e Serie A, ndërsa pritet të zhvillohen edhe ndeshjet e tjera.
Pas disa mundësive të mira nga të dyja skuadrat, duhej ndihma e Miralem Pjanic për të zhbllokuar rezultatin për Juve-n në minutën e 30’. Një gol që vetëm ai di ti shënojë, një e djathtë potente fluturimthi dhe Strakosha nuk kishte asnjë mundësi ta ndalte.
Lazio luan mirë dhe bën gjithcka për të rritur presionin, por prapavija e Juventusit është shumë e fortë dhe nuk lejon hapësira. Goli i dytë duhet të ishte i Ronaldos, por Strakosha kujdeset që të mos ndëshkohet nga ylli portugez, por Mandzukic ndodhet shumë pranë dhe dërgon topin në rrjetë.
Ronaldo kishte disa raste mjaft të mira për të shënuar, por gardiani kuqezi ishte i vendosur për ta ndalur atë, por nuk arriti që të ndalonte edhe Juventusin.
