Ministri i Jashtëm i Serbisë, Ivica Daçiç, pas një takimi me zëdhënësen e Ministrisë së Jashtme ruse, Maria Zakharova, u shpreh se ata që janë kundër ndryshimit të kufijve, duhet të kenë turp. “Ata që thonë se nuk duhet të ketë ndryshim kufijsh, duhet të kenë turp. Ata që na kanë bombarduar neve për të rrënuar kufijtë tanë, janë hipokritë. Kjo vlen edhe për Maqedoninë, e cila e ka njohur Pavarësinë e Kosovës, dhe tani thotë se nuk ka ndryshim kufijsh”, tha Daçiç.
Nga ana tjetër, presidenti serb është i gatshëm për kompromis. “Vuçiç do të pranojë kompromisin në përcaktimin e kufirit me Kosovën, vetëm për një arsye, që Serbia të plotësojë kushtin e fundit për bashkimin në BE”, ka shkruar së fundmi “Reuters”.
Duke qëndruar në të njëjtën linjë, avokati Spartak Ngjela është i mendimit se politika serbe është e trembur, e mbi të gjitha ka ulur kokën për të përcaktuar kufijtë definitivë mes saj dhe Kosovës.
Për rrjedhojë, ka pranuar më në fund njohjen e Kosovës. Pyetja që ai shtron lidhet me faktin se a ka shkëmbim territoresh?! Për të, Kosova nuk ka territore serbe, dhe është marrë me luftë si entitet kushtetues.
Po kështu ai nuk kursehet me kritikat, duke bërë edhe një krahasim mes Vuçiç, Berishës dhe Ramës. Ngjela thotë se Vuçiç dhe stafi i tij politik është shumë më i aftë, dhe se Berisha dhe Rama po shesin interesin kombëtar në Moskë dhe në Stamboll, për të garantuar karrierën e tyre korruptive.
