Elseid Hysaj që në fillim të merkatos ka qenë një ndër emrat më të lakuar për tu larguar tek skuadra e Napolit. Fillimisht ai ishte i lidhur me një kalim tek Chelsea, pasi atje u emërua trajner Maurizio Sarri. Hysaj është mjaft i lidhur me trajnerin italian, por presidenti napolitan nuk ka pranuar që të largohet një lojtarë i tillë, pasi cilësohet mjaft i rëndësishëm.
Por në ditët e fundit duket se edhe Hysaj nuk e ka të sigurt vendin e titullarit, pasi De Laurentiis i ka bërë një dhuratë trajnerit Ancelotti dhe është pikërisht një mbrojtës i krahut të djathtë. Numri një i klubit të kryeqendrës së Campanias mësohet se ka arritur marrëveshjen me PSV Eindhovenin për mbrojtësin e krahut të djathtë, Arias.
Por burimet nga klubi thonë që ardhja e kolumbianit nuk ia bën gati valixhet shqiptarit, përkundrazi ai do të ketë një lojtarë me të cilin do të konkurrojë për një vend titullari dhe kjo do ta bëjë më të fortë. Krahu i djathtë i mbrojtjes ishte pozicioni i vetëm ku Ancelotti nuk kishte një dublues.
Nga ky transferim klubi holandez do të përfitojë 11.5 milionë euro, ndërsa lojtari kolumbian një pagë 1.6 milionë euro në sezon. Nga ana tjetër Ancelotti në miqësoren e fundit e provoi Hysajn si mbrojtës të majtë, ndoshta për të krijuar hapësirë për të dy futbollistët, pasi shqiptari ka treguar edhe sezonin që lamë pas se mund ti luaj mjaft mirë të dy krahët e mbrojtjes.
