Aktori Neritan Liçaj e ka parë tërmetin si shenjë nga Zoti për të treguar që godina e Teatrit është më e fortë nga sa pandehet.
Në vijim të protestave kundër shembjes së Teatrit Kombëtar, përpara kamerave dhe të pranishmëve Liçaj i bëri thirrje kryemininstrit Edi Rama dhe deputetëve ta shihnin këtë çështje si përfaqësues të popullit.
Gjithashtu, aktori i bëri thirrje deputetëve që ta bënin të ndihet krenar që përfaqësohet nga ata. Liçaj tha se nesër ligjvënësit do të tregojnë si do të votojnë, si deputetë dhe shpresë e popullit apo njerëz partiakë.
“Ekzistenca ime varet nga unë dhe vetëm ai lart, ai lart sot dërgoi një shenjë shumë të bukur mbi të gjitha për Ramën, në ditën e ditëlindjes së tij.
Ajo shenjë ishte që kjo nëna jonë e vjetër e plakur na doli më e fortë se ato nuset e reja, parlamenti, ministritë.
Lart në qiell është Nënë Tereza që ka një shenjë të bukur: Kemi harruar se i përkasim njëri-tjterit prandaj nuk gjejmë paqe. Këtë i them ta mbajë vath në vesh edhe kryeministri.
Deputetë, më bëni të ndihem krenar që përfaqësohem nga ju. I jeni betuar, flamurit, kombit e kushtetutës. Nesër do të tregoni si do të votoni, si deputetë dhe shpresë e popullit apo njerëz partiakë. Gjithë populli po ju vëzhgon. Nesër nga ju varet Teatri, kuptoni rëndësinë e këtij vendi,” tha Liçaj.
