Planet për plazh duken si të largëta, kjo për shkak të motit me vranësira. Edhe sot nuk do të mungojnë reshjet e shiut në Veri dhe në Qendër, ndaj çadrën nuk duhet ta harroni.
Paraditja e së premtes pritet të jetë me kthjellime dhe vranësira kalimtare, në të gjithë vendin.
Sipas MeteoAlb, pas mesditës vranësirat fuqizohen lehtësisht në territor, duke sjellë shira të dobët dhe afatshkurtër në Veri dhe pjesërisht në Qendër.
Gjatë pasdites dhe orët vijuese rikthehen kryesisht kthjellime në të gjithë territorin. Temperaturat e ajrit rriten me 2°C gjatë mëngjesit, por rritje më të ndjeshme sjell mesdita, kur pritet maksimumi 32°C.
Era do fryjë e lehtë deri mesatare në det, me shpejtësi 30 km/h nga drejtimi Veriperëndimor, duke krijuar në det dallgëzim deri 2 ballë.
