Anulimi i miqësores nga ana e Argjentinës ka irrituar të apoasionuarit e futbollit në Izrael, por edhe drejtuesit e lartë të shtetit. Kjo ndeshje u anulua nga ana e argjentinasve pasi kishin marrë kërcënime dhe ishin organizuar protesta nga palestinezët, teksa disa prej udhëheqësve të vendit hebre kanë akuzuar Lionel Messin dhe shokët e tij se janë dorëzuar përpara terrorizmit.
Argjentina është një prej skuadrave kombëtare më popullore mes izraelitëve, e fansat po përpiqeshin të shfrytëzonin çdo rast për t’u takuar me Messin nga shumë pranë. “Në fund të fundit bënë gjënë e duhur. Kjo është për të mirën tonë”, tha sulmuesi argjentinas, Higuain. “Shëndeti dhe mirëkuptimi vijnë para së gjithash. Ne mendonim se nuk ishte e drejtë të shkonim atje”.
Kryeministri izraelit, Benjamin Netanyahu i telefonoi presidentit argjentinas, Mauricio Macri për ta nxitur të ndërhynte e të mos dorëzohej. “Është fatkeqësi që ‘kalorësit’ e futbollit argjentinas nuk i rezistuan presionit të nxitësve të urrejtjes ndaj izraelitëve, objektivi kryesor i të cilëve është të dëmtojnë të drejtën tonë themelore për vetëmbrojtje dhe për të shkatërruar Izraelin”, tha ministri i Mbrojtjes, Avigdor Lieberman. “Ne nuk gjunjëzohemi përballë një tufe mbështetësish terroristë dhe antisemitë”.
https://tiranatoday.com/messi-sulmon-izraelin-nuk-luajme-kunder-njerezve-qe-vrasin-femije/
Presidenti i Izraelit, Reuven Rivlin tha se ky ishte një mëngjes i trishtë për tifozët izraelitë të futbollit, përfshi edhe nipërit e tij. “Por, ka disa vlera që janë më të mëdha edhe sesa Messi. Politizimi i lëvizjes së argjentinasve më shqetëson tej mase”, tha ai. Ndërkohë, krerë të opozitës akuzojnë ministrin izraelit të Sporteve se e politizoi këtë shfaqje sportive, duke këmbëngulur ta zhvendoste zhvillimin e ndeshjes nga Haifa në Jerusalemin aq shumë të kontestuar.
Izraeli e pushtoi Jerusalemin Lindor gjatë luftës së Lindjes së Mesme të vitit 1967 dhe e aneksoi atë pjesë të qytetit në një lëvizje të panjohur ndërkombëtarisht. Izraeli e konsideron të gjithë qytetin si kryeqytet të hebrenjve, ndërsa palestinezët kërkojnë që Jerusalemi Lindor të jetë kryeqyteti i shtetit të tyre të ardhshëm palestinez.
