Mbrëmjen e sotme në një emision special ‘Opinion’ u transmetua rasti i 6 vajzave jetime nga Kukësi të cilat jetojnë në kushte të vështira ekonomike.
Drejtori i fondacionit “Fundjavë Ndryshe”, Arbër Hajdari deklaroi sonte se kujdestarinë ligjore të 6 vajzave do ta marrë vëllai i tyre i madh nga babai. Ai tha se vëllai i madh ka kërkuar në gjykatë kujdestarinë ligjore dhe është i gatshëm që t’i marrë në shtëpinë e tij, por sqaroi se shtëpia është e vogël dhe duhet një shtëpi tjetër për to.
Gjithashtu, Arbri rrëfeu mënyrën se si u identifikua rasti. Ai tregoi se rasti i vajzave ishte trasmetuar fillimisht në një televizion lokal.
“Vajzat u identifikuan kur i ndërroi jetë nëna, një media lokale i kishte transmetuar. Vajza e madhe kishte tentuar. Kujdestarinë e vajzave do ta marrë vëllai i madh i vajzave nga babai. Vëllai jeton në Tiranë dhe ka kërkuar kujdestarinë e vajzave. Vëllai jeton në një banesë të vogël, ndaj duhet dhe një banesë tjetër më e madhe për vajzat,” deklaroi Arbër Hajdari.
Fondacioni “Fundjavë Ndryshe”, këtë herë ka marrë për sipër për të ndihmuar 6 motra jetime, të cilat fatkeqësisht nuk kanë as nënën e as babanë. Sikur të mos mjaftonte kjo ato jetojnë në kushte shumë të vështira ekonomike.
Si në shumë raste të tjera, edhe këtë herë Fondacioni “Fundjavë Ndryshe” ka bërë thirrje për ndihmë, ku ka një apel të madh për të gjithë shqiptarët brenda dhe jashtë vendit që sipas mundësive të tyre t’u vijnë në ndihmë 6 vajzave.
Pas humbjes së nënës së tyre ata janë rikthyer në fshat pasi në qytetin e Kukësit vajzat jetonin me qira. Ata rrëfehen se qiradhënësi i kishte nxjerrë nga shtëpia, pasi vajzat nuk kishin mundësi ta paguanin. Përveç ikjes nga qyteti në fshat ata tashmë nuk kanë as mundësi të shkojnë në shkollë, pasi janë rreth një orë larg nga qyteti i Kukësit.
“Që kur na vdiq mami ne erdhëm këtu në fshat. Ne jemi një orë larg Kukësit. Nuk kemi njeri, jemi vetëm. Na mungon shkolla. Jemi shumë keq. Kemi frikë të rrimë këtu. Gjithçka ndodhi ngaqë vdiq mami. Në Kukës ne ishim me qira dhe xhaxhi na nxori jashtë. Por mendoj se kemi shpresën dhe do të rehatohemi si gjithë të tjetër. Mendoj se do të rehatohemi me shkollën, me shtëpinë me të gjitha gjërat. Ju bëj thirrje të gjithëve që të na ndihmojmë që të gjejmë një shtëpi dhe të rehatohemi. U bëj thirrje të gjithë njerëzve. Kam shpresën se dikush do të na ndihmojë” rrëfehet njëra nga vajzat.
Të gjithë shqiptarët por jo vetëm që dëgjojnë këtë histori rrëqethëse dhe që kanë mundësinë për të ndihmuar vajzat të cilat më shumë se kurrë kanë nevojë për mbështetje dhe përkrahje, të mos ngurojnë.
“Nga vdekja e mamit nuk kishim ku të jetonim atje, kemi qenë edhe me qira. Nuk kishte kush të na mbante atje. Na përzuri qiraxhiu i shtëpisë dhe na tha që nuk mund të iu mbaj më këtu dhe erdhëm këtu tek daja. Ne kemi frikë, jemi në mal jemi vetëm këtu. Për ne ka qenë shumë e vështirë për me jetuar këtu për tre muaj. Sepse nga vdekja e mamit dhe nga mërzia që kemi kaluar na duket se u jemi bërë bezdi edhe njerëzve të tjerë, dajës. Motrat shpeshherë qajnë dhe mezi ne mundemi që t’i qetësojmë dhe u themi që do të ikim së shpejti nga këtu. Ne kemi kaluar dimrin këtu. Ka qenë shumë ftohtë. Nuk duam që të jetojmë edhe një dimër tjetër këtu. U bëj thirrje të gjithë shqiptarëve që po na dëgjojnë që të na ndihmojmë që të ikim nga këtu”, tha mes lotësh vajza tjetër.
Kështu në faqen e saj në “Facebook”, Fondacioni “Fundjavë Ndryshe” bën një apel për të gjithë ku shkruan: “APEL PËR NDIHMË
6 vajza, si drita, jetimë, pa nënë e pa bab!
Në Kukës në familjen Poçi. Dhimbje e madhe, midis varfërisë dhe trishtimit për humbjen së fundmi të nënës së tyre.
I kemi premtuar Besartës, Fatimes, Anjezës, Dorianës, Dashmires, Dorentinës se shumë shpejt do ti bëjmë me shtëpi të re.
Do bëjmë çmos që fëmijëve të mos i mungojë gjë, e shumë shpejt ti rikthehen shkollës. Na ndihmoni të bëjmë këto vajza me shtëpi të re!
Zoti na ndihmoftë që ta finalizojmë këtë rast! Edhe nëse nuk keni mundësi të ndihmoni, shpërndani postimin!
LINKU I DHURIMIT : https://ffn.al/en/donate-2/ Të gjithë bashkë do ja dalim. “Bamirësia nuk të varfëron” #fundjavendryshe✅”.
