Në Fier policia ka gjetur një gomone të braktisur e cila dyshohet se do përdorej për trafik të lëndëve narkotike
Mjeti i lundrimit është gjetur në vendin e quajtur Pishpore, e fshehur mes pishave. Gomonia është 10 metra i gjatë dhe me numrat e dy motorve të fshirë.
Ka dyshime që mjeti do përdorej për trafik droge nga Shqipëria drejt Italisë. Gjetja e gomones ka ardhur si rezultat i kontrolle të imtësishme të Delta Forcë dhe policisë tonë kufitare të cilat inspektuan zonat dhe territoret me risk në të cilat dyshohet se mund të trafikohet lëndë narkotike.
Njoftimi i policisë
Policia Kufitare ka konstatuar një gomone e cila dyshohet se do të përdorej për trafikim të narkotikëve.
Policia Kufitare Vlorë në bashkëpunim me Delta Forcë në kuadër të parandalimit të trafikimit të lëndëve narkotike, kanë zhvilluar kontrolle të imtësishme në zonat dhe territoret me risk në të cilat dyshohet se mund të trafikohet lëndë narkotike.
Si rezultat i kontrolleve të vazhdueshme dhe informacioneve të siguruara në rrugë operative, ditën e sotme në vendin e quajtur Pishpore, Fier, midis pishave është konstatuar i fshehur një mjet lundrues tip gomone, i cili dyshohet se do të përdorej për trafikim të narkotikëve drejtim Italisë.
Mjeti lundrues është 10 metra i gjatë me dy motorë.
Nga verfikmet ka rezultuar se ky mjet është i pamatrikulluar dhe me numrat e motorve të fshirë.
Për kryerjen e veprimeve të mëtejshme hetimore dhe procedurale mjeti iu dorëzua DVP.Fier.
