Presidenti Ilir Meta ka folur për hapjen e negociatave me BE-në dhe nga ana tjetër ai nuk ka dashur të komentojë lidhur me lëvizjet e fundit të bëra në Prokuroi. Këto komente Meta i bëri gjatë vizitës në Gjirokastër.
Ndërsa një ditë më parë Prokurorja e Përgjithshme e Përkohshme Arta Marku shkarkoi nga detyra Prokurorin e Krimeve të Rënda Besim Hajdarmataj.
Arta Marku vendosi dje të shkarkonte kreun e Prokurorisë së Krimeve të Rënda, Besim Hajdarmataj dhe ta zëvendësojë përkohësisht me Prokuroren e Durrësit, Donika Prela.
Vetë prokuroria nuk dha një shkak specifik për këtë lirim nga detyra por e argumentoi atë me nevojën për ndjekje penale më të shpejta dhe më të efektshme të çështjeve me përparësi të lartë.
“Emërimi i znj. Donika Prela si kreu i Krimeve të Rënda, do të sjellë ndryshim në drejtim të rezultatit të ndjekjes penale më të shpejtë dhe më të efekshme të çështjeve me përparësi të lartë. Ndjekja penale e krimit dhe korrupsionit, mbetet prioritet më i lartë i kryeprokurores”.
Besim Hajdarmataj është një nga 5 prokurorët që po hetojnë ish-Ministrin e Brendshëm, Saimir Tahiri.
Presidenti Meta u shpreh se “Besoj se janë të gjitha mundësitë deri në qershor duke u përqendruar të gjithë në ato kërkesat, të cilat dihen se kanë të bëjnë me përparësitë kyçe të këtij procesi. Duke bashkëpunuar të gjithë, jam i bindur se është tërësisht e mundshme që rekomandimi pozitiv i Komisionit Evropian të shoqërohet nga një vendim pozitiv i Këshillit të vendeve anëtare”.
I pyetur se si i konsideroni lëvizjet e fundit në Prokurori, kreu i shtetit është shprehur se “Nuk kam asnjë koment përveç sezonit turistik, i cili ka filluar shumë mbarë si në Skrapar, Përmet, edhe sot në Gjirokastër”.
