Çdo ditë pasi dalim nga banesa shohim njerëz në nevojë dhe në kushte të vështira ekonomike. Madje disa prej këtyre njerëzve në nevojë nuk kanë as një banesë që të fusin kokën.
I tillë është rasti i familjes Huqi në Selitë të Re të cilës iu dogj shtëpia para dy muajsh. Brenda shtëpisë u dogj edhe kryefamiljari i saj i cili ishte i paralizuar. Zjarri shkrumboi gjithçka dhe e bëri këtë shtëpi të pabanueshme. Në media u transmetua vetëm rasti i zjarrit dhe humbja e kryefamiljarit por shteti nuk u kujtua më për të. Megjithëse shteti i harroi, por shqiptarët jo.
Edhe për këtë rast “Fundjavë Ndryshe” dhe shqiptarët dhanë kontributin e tyre për ta bërë këtë familje me një shtëpi të re, të ngrohtë dhe të mirë.
Në emisionin “Stop” u publikua momenti kur një pjesë e vullnetarëve dhe donatorëve i treguan familjes Huqi, shtëpinë e re.
“Kjo është një familje për të cilën në nuk kemi bërë shumë zhurmë, pati një fatkeqësi dy muaj më parë por sot në kemi ardhur për t’i dorëzuar shtëpinë e re,” deklaroi Arbër Hajdari, drejtori i fondacionit “Fundjavë Ndryshe”.
E zonja e shtëpisë Vera Huqi, e surpirzuar falenderon të gjithë shqiptarët që dhuruan dhe u kujdesur për atë, por në mënyrë të veçantë stafin e “Fundjavë Ndryshe” që e bënë më shtëpi.
