UEFA ka marrë masa drastike ndaj ekipit grek të Panathinaukosit duke e dënuar me tre vite pezullim nga kompeticionet europiane. Ky përjashtim ka ardhur për shkak të detyrimeve financiare të pashlyera dhe si afat të fundit ka pasur 1 marsin.
Futbollistët e skuadrës greke hynë në grevë në fillim të këtij muaji, në shenjë proteste, pasi nuk kanë marrë pagat e tyre që nga viti i kaluar, gjë që nuk përmbush vendimin e dhënë nga UEFA në muajin dhjetor, duke bërë që ky institucion t’i vendosë edhe një gjobë prej 100 mijë eurosh Panathinaikosit.
Por problemet e Panathinaikosit nuk kanë përfunduar me kaq, pasi para disa muajsh janë dënuar me -3 pikë nga klasifikimi në kampionat pasi nuk i kishte dhënë pagën ish-futbollistit të saj, Jens Wemmer.
Panathinaikos është skuadra greke më e suksesshme në kompeticionet europiane. Ai ka qenë finalist i Kupës së Kampioneve në vitin 1971 dhe ka mundur që të kualifikohet në gjysmëfinalet e këtij aktiviteti në vitet 1985 dhe 1996, ku u mposht nga Liverpooli dhe Ajaxi.
Futbolli në Greqi kohët e fundit ka qenë i përfshirë nga shumë skandale, ku çështja financiare e Panathinaikosit nuk është e vetmja. Skandali më i madh ndodhi vetëm pak muaj më parë ku presidenti i PAOK-ut zbriti në fushë i armatosur gjatë përballjes me AEK dhe këtë e pësoi skuadra. Ata u ndëshkuan nga Federata greke e Futbollit duke humbur edhe titullin kampion kundrejt skuadrës nga Athina.
