Sindikata e Policisë ka dhënë alarmin mbi rrezikun që i kanoset sigurisë kombëtare. Duke iu referuar procesit kaotik që ka nisur mbi Vetingun në Polici, sindikata konstaton se Xhafaj po rrezikon sigurinë kombëtare pasi Policia e Shtetit ka gjasa të boshatiset nga radhët e saj.
Largimi i shumë punonjësve të policisë mund të vijë si pasojë e kaosit që është krijuar me formularët e vetëdeklarimit mbi pasurinë e tyre për t’u përballuar më pas me Komisionin e Vlerësimit i cili do të bëjë edhe kontrollin e pastërtisë së tyre.
E gjitha kjo vjen për shkak se procesi duhet të kishte nisur më 4 prill ndërkohë që formularët u janë paraqitur më 13 prill duke krijuar konfuzion dhe një hapësirë kohore krejt të shkurtër për të plotësuar me të dhëna të sakta formularin e vetëdeklarimit të pasurisë së tyre.
Për këtë arsye, Sindikata e Policisë i është drejtuar me një letër ministrit të Brendshëm duke i kërkuar atij të shtyjë kohën e plotësimit të formularit të vetëdeklarimit të pasurisë nga ana e radhëve të policisë.
“Vendosja në një situatë të tillë detyruese me një afat kohor kaq të shkurtër për punonjësit e policisë mendojmë se do të ketë pasoja edhe për sigurinë kombëtare për shkak të numrit të madh të punonjësve të policisë që do të lënë detyrën për shkak të zbatimit të tyre”, shkruan në letrën drejtuar ministrit Xhafaj, kreu i kësaj sindikate Sadetin Fishta.
Për të shmangur këtë rrezik, Sindikata e Policisë kërkon shtyrjen e afatit për plotësimin e vetëdeklarimit të pasurisë nga ana e radhëve e punonjësve të Policisë së Shtetit.
“Koha e lënën në dispozicion ka qenë e pamjaftueshme për të siguruar dokumentacionin e nevojshëm, të plotë për të përmbushur 11 kërkesat e deklarimit të pasurisë, sipas pikës 1 të nenit 32, të ligjit 12/2018, për ti bashkangjitur e hedhur ato në faqen 15 të formularit të deklaratës së pasurisë, “Inventar” i dokumentacionit justifikues/shoqërues të deklaratës së pasurisë. Në radhë të dytë, shpenzimet e detyrueshme e të pajustifikuara ligjërisht nga buxheti familjar, që i kalon shumën 3000 lekë të reja për çdo pjesëtar të familjes dhe person të lidhur me të, me gjithë uljet e tarifave nga bankat me gjithë reagimin pozitiv tuaj ndaj tarifave të larta të bankave, për tu pajisur me dokumentacionin e nevojshëm për deklarimin e pasurisë sipas kërkesave të ligjit”, thuhet në kërkesën e Sindikatës së Policisë.
TIRANA TODAY
