Skandali me Vetingun në Policinë e Shtetit nuk të ndalur. Pavarësisht trumbetimeve të mëdha për të pastruar policinë nga radhët e elementëve të lidhur me botën e errët të krimit, vetë procesi i Vetingut po zhvillohet në kushte aspak serioze.
Pas skandalit që publikoi një ditë më parë Tirana Today lidhur me sorollatjen e punonjësve të policisë nëpër banka për të vërtetuar pagat e marra ndër vite edhe pse paguhen nga vetë institucioni i policisë, tani po vihet në pikëpyetje vetë procesi i Vetingut në Polici.
Kjo vjen për shkak pasi punonjësve të policisë iu është paraqitur me shumë vonesë formulari i vetëdeklarimit të pasurisë edhe pse procesi duhej të niste që në fillim të këtij muaji.
Sipas burimeve kofidenciale për Tirana Today, bëhet e ditur se punonjësve të policisë iu është paraqitur për t’u plotësuar formuluari më datë 13 prill ndërkohë që një gjë e tillë duhet të kishte nisur që më 4 prill të këtij muaji.
Si të mos mjaftonte nisja me vonesë e këtij procesi, ministri Xhafaj po sorollat nëpër bankat punonjësit e policisë që të vërtetojnë pagat e tyre ndër vite për t’ia paraqitur Komisionit të Vlerësimit. Ndërkohë që një gjë e tillë nuk parashikohet aspak në ligj dhe për rrjedhojë tregon mungesën e seriozitetit sa i përket të dhënave mbi pagat e punonjësve të saj nga ana e Policisë së Shtetit.
E gjitha kjo po rëndon mbi xhepat e punonjësve të policisë të cilët duhet të sigurojnë një numër dokumentesh për t’i paraqitur si vërtetime për plotësimin e formularit të vetëdeklarimit të pasurisë, gjë të cilën duhet ta kryejë vetë Komisioni i Vlerësimit për të bërë të mundur verifikimin e figurës së çdo punonjësi në radhët e Policisë së Shtetit.
Duke parë këtë situatë rrumpallë në Policinë e Shtetit Sindikata e Policisë kërkoi sot ministrit Xhafaj shtyrjen e afatit për plotësimin e formularit nga ana e punonjësve të policisë pasi në të kundërt rrezikohet që formularët të plotësohen me mangësi.
Për rrjedhojë, kjo mund të sjellë largimin nga detyra të një numri punonjësish të Policisë së Shtetit, që mund të rezultojë jo për faj të tyre por të gjendjes kaotike që po zhvillohet me Vetingun në Polici.
Ndërsa shton Xhafaj po rrezikon sigurinë kombëtare me kaosin që ka prodhuar me formularët e vetëdeklarimit për shkak të probabilitetit të lartë të largimit të punonjësve nga radhët e policisë.
“Koha e lënën në dispozicion ka qenë e pamjaftueshme për të siguruar dokumentacionin e nevojshëm, të plotë për të përmbushur 11 kërkesat e deklarimit të pasurisë, sipas pikës 1 të nenit 32, të ligjit 12/2018, për ti bashkangjitur e hedhur ato në faqen 15 të formularit të deklaratës së pasurisë, “Inventar” i dokumentacionit justifikues/shoqërues të deklaratës së pasurisë. Në radhë të dytë, shpenzimet e detyrueshme e të pajustifikuara ligjërisht nga buxheti familjar, që i kalon shumën 3000 lekë të reja për çdo pjesëtar të familjes dhe person të lidhur me të, me gjithë uljet e tarifave nga bankat me gjithë reagimin pozitiv tuaj ndaj tarifave të larta të bankave, për tu pajisur me dokumentacionin e nevojshëm për deklarimin e pasurisë sipas kërkesave të ligjit”, thuhet në kërkesën e Sindikatës së Policisë.
TIRANA TODAY
