Kryeministrin Edi Rama, përmes një vendimi të Këshillit të Ministrave, Nr. 203, datë 11.4.2018, i rekomandon Prokurorit të Përgjithshëm Arta Marku, mbi prioritet që duhet të ketë në luftën kundër kriminalitetit, për vitin 2018.
Këshilli i Ministrave miratoi dhe i përcolli Prokurorit të Përgjithshëm, Arta Marku, Rekomandimet Prioritare që duhen ndjekur për vitin në vazhdim në luftën kundër kriminalitetit. Ministrja e Drejtësisë, Etilda Gjonaj ia bën të njohura Rekomandimet e Këshillit të Ministrave, drejtuesve të prokurorive të të gjitha shkallëve në një mbledhje të përbashkët, thuhet në VKM.
Me qëllim forcimin e luftës kundër korrupsionit, Këshilli i Ministrave i rekomandon Prokurorit të Përgjithshëm:
i) Rritje të hetimeve proaktive dhe teknikave speciale të hetimit;
ii) Kryerja e hetimeve sistematike pasurore dhe rritje e numrit të aseteve të sekuestruara që prej fazës fillestare të hetimit dhe konfiskimin e tyre në përfundim;
iii) Hetime të shpejta dhe bashkëpunim me agjencitë ligjzbatuese;
iv) Bashkëpunimi me agjencitë ligjzbatuese ndërkombëtare sidomos për kryerjen e hetimeve pasurore financiare që lidhen me veprat penale të korrupsionit;
v) Përmirësimi i cilësisë së hetimeve të kryera me qëllim rritjen jo vetëm të personave të dërguar për gjykim por edhe rritje të personave të dënuar me vendim të formës së prerë;
vi) Ashpërsim të politikës penale në drejtim të masave të sigurimit dhe atyre të dënimit;
vii) Forcim të kapaciteteve profesionale nëpërmjet trajnimeve të përbashkëta me agjencitë e zbatimit të ligjit të përfshira në luftën kundër korrupsionit;
viii) Trajnime të oficerëve të policisë gjyqësore, të cilët janë një hallkë shumë e rëndësishme e hetimeve;
ix) Rritja e aksesit dhe përdorimit të të dhënave në databazat shtetërore;
x) Rritjen e cilësisë së mbajtjes dhe raportimit të të dhënave statistikore duke rritur profesionalizmin e burimeve njerëzore dhe zhvillimin e sistemit elektronik të teknologjisë së informacionit.
Lufta kundër krimit të organizuar
Lufta kundër krimit të organizuar dhe trafiqeve të paligjshme është një element shumë i rëndësishëm në përmbushjen e standardeve në kuadër të integrimit të Shqipërisë dhe hapjen e negociatave të anëtarësimit. Lufta pa kompromis dhe ndëshkimi i ashpër penal ndaj grupeve dhe organizatave kriminale, duke goditur çdo aset ekonomik të paligjshëm të tyre, është prioritet absolut i qeverisë.
Këshilli i Ministrave i rekomandon Prokurorit të Përgjithshëm:
i) Forcim të bashkëpunimit me policinë gjyqësore dhe agjencitë e tjera ligjzbatuese, me qëllim shkëmbimin e informacionit, kryerjen e analizave dhe vlerësimeve të përbashkëta, me qëllim rritjen e efektivitetit të hetimeve ndaj grupeve të strukturuara kriminale;
ii) Hetime sistematike pasurore dhe rritje të numrit të aseteve të konfiskuara, në zbatim të ligjit 10192/2009, ndryshuar me ligjin 70/2017, specifikisht në drejtim të masave parandaluese;
iii) Rritje të numrit dhe cilësisë së hetimeve për veprën penale të pastrimit të produkteve të veprës penale dhe atë të pastrimit të parave, në funksion të rritjes së numrit të çështjeve dhe të pandehurve të dërguar për gjykim;
iv) Rritjen e bashkëpunimit me agjencitë ligjzbatuese rajonale dhe ndërkombëtare në funksion të efektivitetit të hetimeve për grupet e strukturuara kriminale që lidhen sidomos me trafikimin e narkotikëve, pastrimit të parave, financimin e terrorizmit, trafikimin e qenieve njerëzore, në rastet e emigrimit, veçanërisht për kategori vulnerabël si azilkërkuesit dhe personat e mitur të pashoqëruar;
v) Rritje të numrit dhe të cilësisë së hetimeve duke përdorur teknikat speciale të hetimit;
vi) Ashpërsim të politikës penale në drejtim të masave të sigurimit dhe atyre të dënimit;
vii) Forcim të kapaciteteve profesionale të prokurorëve, por edhe të oficerëve të policisë gjyqësore;
viii) Rritja e aksesit dhe e përdorimit të të dhënave në databazat shtetërore, në funksion të shpejtësisë dhe efektivitetit të së hetimeve;
ix) Rritjen e cilësisë së mbajtjes dhe raportimit të të dhënave statistikore duke rritur profesionalizmin e burimeve njerëzore dhe zhvillimin e sistemit elektronik të teknologjisë së informacionit.
