Kancelarja gjermane Angela Merkel do të presë në një vizitë zyrtare në Berlin kreun e shtetit serb Aleksandër Vuçiç. Ky takim pritet të ketë një rëndësi të madhe lidhur me qëndrimin e Serbisë në rajon dhe raportet e saj me Kosovën, ku situata mbetet ende e nderë për shkak të arrestimit nga policia e Kosovës të liderit të Listës Serbe, Marko Gjuriç.
Takimi i cili bëhet i ditur nga zyra e kancelares gjermane, tregon se Vuçiç po merr një rol me rëndësi në çështjet e Ballkanit në sytë e Angela Merkelit, ndryshe nga sa mendohej deri tani se këtë status e kishte kryeministri i Shqipërisë Edi Rama.
Duket se kreu i ekzekutivit shqiptar është lënë prej kohësh në hije nga kancelaritë e Brukselit dhe të Gjermanisë, duke pasur parasysh keqqeverisjen e tij dhe domosdoshmërinë e plotësimit të reformave, veçanërisht asaj të drejtësisë e cila është edhe rruga nga duhet të kalojë Shqipëria për të hapur ose jo negociatat. Përveç këtij fakti është edhe treguesi tjetër që roli i kryeministrit Edi Rama në rajon ka rënë ndjeshëm aq sa edhe ndikimi dhe raportet me politikanët e trojeve shqiptare janë përkeqësuar së fundmi, mjafton të përmendim marrëdhëniet e tij me kryeministrin e Kosovës, Ramush Haradinaj. Ndërkohë që retorika e tij populiste dhe kërcënimet e shpeshta drejtuar BE-së se është gati të shkojë me Rusinë, ia kanë humbur gjithë kredibilitetin në sytë e Brukselit.
Takimi Merkel-Vuçiç
Takimi midis Angela Merkelit dhe Aleksandër Vuçiç do të mbahet më 13 prill dhe në qendër të tij pritet të jenë bisedimet për marrëdhëniet bilaterale, por edhe çështjet rajonale. Në këtë shtrëgim duarsh midis Merkelit dhe Vuçiç pritet të diskutohet për zgjidhjen e konfliktit dhjetëravjeçar me Kosovën.
Në këtë kuadër presidenti serb ka biseduar në telefon me kancelaren Merkel të premten, (06.04) bëjnë të ditur mediat, edhe për zgjidhjen e konfliktit me Kosovën. Vuçiç ka bërë të ditur se do të bëjë propozime për një zgjidhje të qëndrueshme në marrëdhëniet me Kosovën. Berlini intensifikon bisedimet me Serbinë për zgjidhjen e konfliktit në Kosovë. Ardhja e Vuçiçit është hera e dytë brenda dy muajsh, në fund të shkurtit ai u prit nga kancelarja gjermane.
“Dihet se Serbia mund të afrohet më tej me Brukselin, vetëm nëse i jep përfundimisht zgjidhje konfliktit me Kosovën. Kosova e njohur nga më shumë se 110 shtete nuk njihet nga disa vende të BE. Anëtarë si Spanja, Rumania apo Qiproja kanë kërcënuar madje bllokimin e samitit të Ballkanit Perëndimor të presidencës bullgare në maj në Sofje, nëse Kosova ftohet si shtet i barabartë. Edhe Greqia dhe Sllovakia nuk e pranojnë njohjen e Kosovës si shtet të pavarur”, shkruan Deutsche Welle.
