Futbolli në Shqipëri është në një kolaps të vërtetë, pasi Skënderbeu është dënuar nga UEFA me 10 vite pezullim nga kompeticionet europiane dhe 1 milionë euro gjobë, ndërsa Gjykata e Tiranës nuk ka pranuar të regjistrojë zgjedhjet e FSHF-së të zhvilluara në 7 shkurt.
Lufta e korçarëve vazhdon në dyert e Gjykatës së Arbitrazhit në Zvicër për të ulur dënimin apo për tu falur plotësisht.
Analistët e njohur sportivë, Bashkim Tufa dhe Fatmir Mneri në një prononcim për Tirana Today janë shprehur:
Mneri: “Realisht duhet të qajmë pasi nuk flitet për një ndëshkim disiplinor, me heqje pikësh apo ndeshje pa tifozë. Por për një ndëshkim që njollos gjithë futbollin shqiptar.”
Tufa: “Keqardhje pasi Skënderbeu në këtë dekadë u bë një shembull i mirë për klubet e tjera.”
Në CAS, Skënderbeu shpreson që të vendoset drejtësi dhe ata të fitojnë këtë betejë duke e hequr dënimin dhe të mos penalizohet në këtë mënyrë që mund të sjellë edhe shkrirjen e klubit. Por sa janë shanset që kjo betejë me UEFA-n të fitohet?
Mneri: “Shanset janë minimale për të mos thënë zero.”
Tufa: “Kujtojmë gjyqet që bëri Federata për ndeshjen me Serbinë në vitin 2014 dhe ndoshta i njëjti skenar të jetë i vlefshëm për Skënderbeun. I cili përpos CAS-it ka një mundësi tjetër në Gjykatën Federale në Zvicër.”
UEFA në vendimin final e ndëshkon Skënderbeun vetëm për katër ndeshjet e zhvilluara në kopeticionet europiane, duke lënë mënjanë mbi 50 ndeshjet e dyshuara në kampionatin shqiptar nga korçarët.
Tufa: “Tek UEFA shoh dy standarde, në një kuptim që unë mbroj produktin tim, që do të thotë kupat e europës. Ju shqiptarët në kampionatin shqiptar vrisni veten, bëni ç’të doni. Të paktën kështu mund ti interpretosh veprimet e fundit.”
Çdo javë të Superiores shohim sulme të shumta ndaj arbitrave. Skuadra e arbitrave duket më e dobëta në kampionatin shqiptarë, por vërtetë janë ata që vendosin fatin e takimit apo përdoret si justifikim nga ekipet që mposhten?
Mneri: “Sot ne nuk kemi një model gjykimi, filloi të përgatitej si model Jemini dhe Jorgji. Ata nuk ekzistojnë më, Jemini është larguar ndërsa Jorgji me atë që ka bërë në Kukës për mua nuk duhet të gjykonte më.”
Tufa: “Kemi dhe gjyqtarë që gabojnë, por në disa raste përdoren si justifikim për të mbuluar trajnerët, klubet dhe mangësitë e tyre. Dy gjyqtarë që ishin përgatitur për në familjen europiane dështuan në testet.”
Gjykata e Tiranës nuk ka regjistruar zgjedhjet e mbajtura në 7 shkurt për president të FSHF-së dhe të Komitetit Ekzekutiv. Këto zgjedhje kanë bërë një bujë të madhe pasi Armando Duka kishte përballë një figurë të fortë politike si Bashkim Fino. Por çfarë ndikimi sjell përsëritja e tyre në futbollin shqiptar?
Mneri: “Është e trishtueshme kur tjetri të thotë duhet të ribësh zgjedhjet. Por në qoftë se janë bërë shkelje, them se të gjithë fitojmë”.
Tufa: “Statura politike e Finos, ka ndikimin e vet. Nuk do ishte mirë për futbollin, pasi do ishte një goditje tjetër pas kësaj të Skënderbeut.”
Eno Leka, TIRANA TODAY
