Prej vitesh Dinamo është duke luajtur në nivele mjaft të ulëta në të gjitha sportet, por goditjen finale për ta shkatërruar si fenomen ia dha Federata Shqiptare e Futbollit bashkë me qeverinë aktuale. Shkatërrimi i kompleksit Dinamo ishte goditja e fundit, pasi ajo ishte godina që mbante gjallë historinë e një klubi që ka shkruar historinë në sportet shqiptare.
Shaban Uka, ish-volejbollisti i ekipit të Dinamos rikthehet pas shumë vitesh në kompleksin ku hodhi hapat e para drejt një karriere të madhe. Por ajo që gjeti nuk ishte gjë tjetër veçse një gërmadhë.
“Më rrëqethet trupi, kur e pashë dhe sot kështu të shkatërruar. Nuk e di ku është qëllimi dhe nuk arrijë ta kuptoj,” shprehet Uka.
“Nuk jam kundra që FSHF të ketë një qendër të saj, por pse duhet të prishim një klub që të ndërtojmë diçka tjetër.”
Uka u shokua në momentin që pak ditë më parë gjeti tek tregu Çam fotografinë e tij dhe të legjendave të tjera të Dinamos që shiteshin atje.
“Ai moment më goditi rëndë, pasi ato foto ishin të varura në klub, të afishuara në mur dhe të jepnin kënaqësi. Kur pashë aty ngela pa frymë dhe e pyeta atë se ku i keni gjetur? Më tha që mi kanë dhënë për ti shitur,” vazhdon Uka.
Ishte kryeministri i Shqipërisë, Edi Rama një ish-basketbollist, që firmosi shkatërrimin e kompleksit Dinamo. “Këtë me thënë të drejtën nuk di si ta shpjegoj, më ka habitur”, shprehet Shaban Uka.
Këto veprime duket si një tendencë për të zhdukur klubin e Dinamos, pasi si në futboll, volejboll, basketboll dhe në sportet e tjera ka shumë vite që ekipet dinamovite nuk shkëlqejnë.
“Të mendohen edhe njëherë që Dinamon të mos ta shkrijnë, por të bëjnë përpjekje pasi mundësitë besoj se ekzistojnë që ta ringrejnë si klub”, përfundon Uka.
Eno Leka, TIRANA TODAY
