Ministri i Punëve të Jashtme Ditmir Bushati ka komentuar sot vendimin e Presidentit Ilir Meta i cili i dha atij autorizimin dhe plotfuqishmërinë për negociatat me Greqinë.
“Pa humbur kohë ne do procedojmë me plotfuqishmërinë dhe për pak ditë apo javë do bëjmë edhe raundin e parë të diskutimeve teknike me palën greke bazuar me një punë parapërgatitore që ka ndodhur gjatë 4 viteve. Jemi shumë të vendosur të shkojmë drejt një marrëveshje sa më të drejtë, sa më të ndershme për të mos përsëritur asnjë nga gabimet e 2009 dhe natyrisht për të respektuar normat ndërkombëtare që janë të detyrueshme për Shqipërinë dhe Greqinë, vendimmarrjen e Gjykatës Kushtetuese, legjislacionin e brendshëm shqiptar dhe ne besojmë dhe jemi të motivuar për të shkuar drejt një marrëveshje që do jetë e drejtë, e ndershme, më e mirë nuk diskutohet se ajo e 2009 dhe në fund të ditës urojmë të kemi një marrëveshje që do jetë e zbatueshme”.
Sa parashikohet të zgjasin negociatat?
Bushati: Në planin teknik këto negociata po fillojnë dhe Shqipëria po shkon drejt një marrëveshje të re, kjo është më e rëndësishmja. Kohëzgjatja e negociatave ka një rëndësi të dorës së dytë, për ne rëndësi të dorës së parë ka produkti që do dalë nga këto negociata.
