Kombëtarja e Kosovës ka arritur të afrojë në gjirin e saj dy talente mjaft të rëndësishëm të cilët ishin kërkuar me mjaft interes edhe nga FSHF. Pas Edon Zhegrovës, që erdhi nga radhët e Genk të Belgjikës, i radhës është Idriz Voca. Futbollisti i Luzerna-s ka bërë zgjedhjen që i është dukur më e arsyeshme, pasi ka bërë disa llogari për interesa personale. Ai fillimisht u bashkua me Zvicrën, ndërsa më pas u grumbullua nga Shqipëria, por zgjedhja e tij e fundit ishte vendlindja e tij, Kosova.
“Unë dua të luaj për vendlindjen time. Kjo është çështje zemre. Kjo është një ëndërr që bëhet realitet”, – shprehet Voca për mediat zvicerane, para se të pranonte se arsyeja pse zgjodhi Kosovën ishte se te Zvicra, ku ka luajtur me përfaqësuesen U-20, nuk do të kishte shanse të luante rregullisht.
“Te Kosova kam më shumë mundësi që të bie në sy. Në Zvicër ka shumë lojtarë të rinj të talentuar të cilët janë para meje”, – pranoi mesfushori. Voca është ndjekur me interes edhe nga FSHF dhe u grumbullua në janarin e vitit të kaluar me U-21. Por ai më pas zgjodhi t’i bashkohet Kosovës.
I kritikuar për këtë zgjedhje, Voca duket se i ka idetë e qarta, pasi nuk e quan Shqipërinë vendin e tij. “Unë thjesht bëra stërvitje me Shqipërinë, asgjë më shumë. Unë jam një shqiptar i Kosovës. Nuk jam shqiptar. Ndaj për mua zgjedhja ishte e qartë. Është gjithmonë lojtari ai që vendos. Dhe është e qartë që lojtari zgjedh një shtet i cili ndihmon karrierën e tij”, – tha Voca për mediet zvicerane.
