Vetëm pak kohë pasi dha dorëheqjen Rania Antonopoulos, ministrja e Punës, në Greqi ka dhënë dorëheqjen edhe burri i saj, ministri i Ekonomisë dhe Zhvillimit në Greqi Dimitris Papadimitriou.
Mediat greke bëjnë me dije se ai ka pasur një takim vonë natën me kryeministrin Alexis Tsipras, i cili ra dakord me vendimin e ministrit për të hequr dorë nga detyra.
Shkak u bë skandali i zbuluar pak kohë më parë, se ministrja greke merrte një subvencion për qiranë e banesës prej 1000 euro në muaj.
Mediat greke raportojnë se debati me Cipras u zhvillua në një klime te paqtë dhe ai e falënderoi ministrin për punën e deritanishme që ka bërë në sferën e thithjes se investimeve.
Kryeministri grek duhet të shpallë emrat e rinj të kabinetit sa më shpejt. Çifti ministror, më të pasurit e qeverisë sot e të ardhur nga New York për të kontribuuar në nxjerrjen e vendit nga kriza, merrnin edhe asistencë për qira nga populli grek, një skandal ky i zbuluar nga opozita. Gjithsesi, nuk priten ndryshime të mëdha nga kryeministri Cipras, por vetëm të detyrueshme.
