Ish-ministri i Transporteve, Edmond Haxhinasto, ka dalë nga Prokuroria e Krimeve të Rënda, ku ka dhënë dëshminë e tij për rreth 2 orë.
Haxhinasto ishte thirrur sot për t’u marrë në pyetje, teksa po hetohet lidhur me abuzimin me rrugën Tiranë-Elbasan, ndërsa dy ish-drejtorë tashmë janë në pranga.
Deputeti i LSI-së, Haxhinasto ka folur shkurt para mediave, teksa tha:
“Fola për ato gjëra që kanë të bëjnë me përgjegjësitë e mia si ish drejtues i ministrisë së Transporteve dhe Infrastrukturës gjatë një periudhe, e theksoj, të zhvillimit të këtij tenderi.”
Çështjen e korrupsionit çoi në pranga dy ish-drejtorë të lartë, Dashamir Xhikën dhe Andi Tomën, të cilët akuzohen për abuzime lidhur me rrugën Tiranë-Elbasan dhe rrugën e Gjinarit. Marrja në pyetje e Haxhinastos vjen pas arrestimit të ish-zyrtarëve të lartë të ARRSH-së.
