Policia italiane ka shkatërruar një grup kriminal në Romë të cilët ushtronin aktivitete të paligjshme në sektorin e makinave elektronike, armëmbajtje pa leje, vjedhje me dhunë, kërcënim dhe zhvatje. Një ndër anëtarët e kësaj bande është edhe boksieri shqiptar Orial Kolaj, i cili është arrestuar në vitin 2013 ndërsa sot Policia Financiare e Romës ka dhënë urdhrin për sekuestrimin e pronave.
Guardia di Finanza në Romë ka sekuestruar të premten pasurinë e grupit kriminal të përbëre prej 9 personash, i cili arrinte vlerën e 23 milionë euro. Dyshohet se Kolaj dhe pjesa tjetër e grupin ishin pjesë e klanit të Kamorrës Casale, e lidhur me grupin Iovine dhe grupi Guarnera Acilia, shkruan Tirana Today.
6 prej të akuzuarve, kanë marrë dënimin që nuk mund të largohen nga komuna ku banojnë për tre vite, pasi do të jenë nën mbikëqyrje të posaçme. Hetimet kanë filluar në tetor të vitit 2013 si pjesë e “Lojërave penale” që i kishte çuar në arrestimin e disa anëtarëve të klanit për krime mafioze, transferime mashtruese të pronës, kamata, grabitje, vjedhje, konkurrencë ilegale me kërcënime e dhunë dhe posedimit të armëve, shkruan Corriere di Viterbo.
Në veçanti, shefi Mario Iovine, i quajtur “Rififi”, i kishte zgjeruar aktivitetet e tij të paligjshme në sektorin e makinave të lojërave të fatit në Campania dhe Lazio. Pas arrestimit të tij në dhjetor të vitit 2006, vëllezërit Guarnera kanë organizuar një grup të vetin mafioz, për të çuar biznesin e paligjshëm përpara, duke përdorur, ndër të tjera, edhe një grup të armatosur të përbërë nga shqiptarë të quajtur “Boxers”, ku përfshihet edhe boksieri Orial Kolaj, ish-kampion italian dhe evropian me peshë mesatare, shkruan Tirana Today.
Pasuritë e sekuestruara janë:
–kuotat aksionare, kapitalin aksionar dhe të gjithë pasuritë e 5 kompanive aksionare
–8 prona të paluajtshme në territorin e Romës, e në provincën e Nuoros e Aquilas
–një terren i pozicionuar në Romë
–8 makina
–1 motor
Përshtati TIRANA TODAY
