Ambasadorja amerikane në Kombet e Bashkuara, Nikki Haley ka përsëritur kërkesën që të merren masa ndaj Iranit, pas prezantimit të raportit të OKB-së, ku thuhet se Irani ka shkelur ndalimin e organizatës për armatosjen e rebelëve huthi në Jemen.
“Është koha që Këshilli i Sigurimit të veprojë”, është shprehur Haley, e cila tha se në fakt raporti thekson atë cfarë SHBA e ka thënë prej muajsh, se Irani ka transferuar armë në mënyrë të paligjshme duke shkelur disa rezoluta të Këshillit të Sigurimit.
Sipas raportit të ekspertëve të OKB-së, thuhej se se raketat balistike iraniane dhe armë të tjera janë gjetur në Jemen dhe se Irani ka dështuar në marrjen e masave të duhura për të parandaluar dërgimin e armëve te rebelët.
Sipas ekspertëve, Irani ka shkelur ndalimin për armët, ndërkohë që e ka të ndaluar transferimin e armëve përveç nëse Këshilli i Sigurimit e miraton një gjë të tillë.
“Bota nuk mund të vazhdojë që lejojë që këto shkelje të mbesin pa përgjigje. Irani duhet ta dijë se do të ketë pasoja për sfidimin e komunitetit ndërkombëtar. Është kohë që Këshilli i Sigurimit të veprojë”, ka thënë Haley.
Ajo ka kërkuar vazhdimisht veprime të OKB-së kundër Iranit, duke ftuar ambasadorët në këtë organizatë, që të shohin, se SHBA-ja ka të dhëna se raketat balistike të Iranit janë përdorur nga rebelët huthi për të nisur sulme kundër Arabisë Saudite disa herë gjatë vitit të kaluar.
Irani kundërshton furnizimin me armë për rebelët, pavarësisht që përkrah hapur rebelët shiitë në luftën civile kundër qeverisë së Jemenit, e cila përkrahet nga Arabia Saudite.
