Analisti Fatos Lubonja tha sot se qeveria po përdor prokurorinë për të arrestuar opozitarët që të jetë e qetë në vjedhjen e vendit. I ftuar në studion e lajmeve në “News 24”, Lubonja deklaroi se po arrestohen vetëm opozitarë duke e vënë theksin se është luftë politike. Ai sqaroi se asnjë qeveritar nuk është në burg. Lubonja përmendi edhe rastin Tahiri, i cili u mbrojt nga qeveria.
Analisti nuk e mohoi faktin se ndonjë nga qeveria mund të behët kokë turku por jo në masë. Ai tha se e gjithë Shqipëria noton në një det paligjshmërie.
“Sot po arrestohen vetëm opozitarë, shikoni se çfarë ndodh asnjë qeveritar në burg. Shikoni si qeveria u soll dhe mbrojti rastin Tahiri. Ndonjë nga qeveria mund të bëhet kokë turku por jo në masë. E gjithë Shqipëria noton në një det paligjshmërie. E mira nuk matet me aktin që bën. Nëse fut dikë në burg se nuk të lë ty të vjedhësh atëherë është qëllimi i keq. Shenja e parë e një drejtësie që funksionon është kur merret më të fortët dhe jo me të dobëtit“, deklaroi Lubonja.
Lubonja iu referua arrestimeve të fundit të prokurorisë të ish-drejtorëve të LSI-së, ku më i rëndësishmi është Dashamir Xhika për afera me rrugët Elbasan-Tiranë dhe rrugën Elbasan-Gjinar. Në korridoret e politikës flitet se pritet dhe arrestimi i Edmond Haxhinastos, aktualisht deputet i LSI-së, por që ka mbajtur postin e ministrit të Transportit më parë.
