Qëndrimi i kryeministrit Rama në lidhje me diskutimet me palën greke ka marrë kritika të forta nga kreu i FRD-së, Bamir Topi, ndërsa ka injoruar përvojën e krerëve të lartë të politikës shqiptare, pasi sipas tij, nuk kanë dhënë atë që duhet për interesin kombëtar.
Ish-Presidenti i Bamir Topi teksa ka folur në “Repolitix”, ka theksuar se po të ishte për të, duke patur parasysh interesin kombëtar do ta thirrte edhe Ramiz Alinë, nëse do të ishte gjallë.
Topi la të kuptohet se kjo është një pikë e dobët për Ramën, pasi nuk e ka marrë në konsideratë atë që, disa ish-presidentë janë gjallë, por nuk janë pyetur dhe s’është marrë mendimi në diskutimet Shqipëri-Greqi.
Ai porositi Ramën të ndryshojë qasjen e komunikimit dhe të rrisë transparencën dhe jo të merret me timonin apo tepsinë.
“Janë katër presidentë gjallë dhe një i pestë është në detyrë. Shqipëria nuk ka Senat për të korrigjuar gabime politike, në këto kushte, nuk e ke shansin që t’i bësh gjerat në mënyrë personale dhe në kushtet totale të transparencës. Ne po kërkojmë transparencë për gjëra që ndodhin rëndom përditë, e jo më për gjëra të interesit kombëtar që duhet të jetë në transparencë të plotë dhe plotësisht të qartë. Është e papranueshme, sepse gjatë gjithë bisedimeve shohim një ministër të jashtëm vetëm duke kërcyer dhe nuk zbaton detyrimin e parë të transparencës publike: ka qeveri, ka opinion publik. Nëse e marr informacionin nga ministri Kotzias në atë formë, ç’mund të presësh. E kam me kryeministrin Rama, që tenton të jap shpjegime post-factum, kur gjërat marrin sensibilutet të lartë në Shqipëri. Në vend të merret me rëndimin e vokabularit të tij, tepsinë, kazanin timonin, duhet të merret më seriozisht me një tjetër lloj transparence. Dhe duhet të ndryshojë mënyra e komunikimit. Kur janë gjëra serioze, i gjithë parlamenti duhte të jetë shumë serioz”-tha ai.
Deklaratat e Ramës në lidhje me atë se shqiptarët duhet të presin deri në prill dhe të shihni se çfarë është përparuar mes Greqisë dhe Shqipërisë, kjo linjë për Topin i ngjan lojës së fëmijëve, kur i thonë njëri tjetrit a do të vish nga lagjja ime, por sipas tij, kjo nuk është një gjuhë kryeministrore.
“Kur ishim të vegjël dhe grindeshim, ai që ishte nga lagjja tjetër thoshte, do ta shohesh kur të vish nga lagjia ime. Kjo nuk është gjuhë kryeministrore. Nëse e ke në koshiencë se ç’do ndodhi, duhet të na e thuash zotëri” – tha ai.
