Kryeministri Edi Rama tha sonte se qeverisë së tij nuk i intereson nëse Greqia thotë nuk njoh çështje çame. I ftuar në emisionin “Real Story” në “Vizion +” Rama deklaroi se për qeverinë e tij “çështje çame” përfaqëson problemet e një komuniteti shqiptarësh, të quajtur komuniteti çam, që lidhen me të drejtën përkujtimore, pronën dhe të drejtën e lëvizjes.
“Kush e hapi çështjen çame, e hapi Greqia apo e hapëm ne? Greqia thotë nuk njoh çështjen çame, dhe ka arsye, sepse për Greqinë çështje çame do të thotë pretendim territorial, në tokën e Republikës së Greqisë. Në asnjë mënyrë ne nuk kemi pretendime territoriale. Për ne çështja çame e ka një emër të tillë, por përfaqëson problemet e një komuniteti shqiptarësh, të quajtur komuniteti çam, që lidhen me të drejtën përkujtimore, pronën dhe të drejtën e lëvizjes. Ne nuk na intereson nëse Greqia thotë nuk njoh çështje çame. Ne duam një marrëveshje të të drejtave të njeriut, që lidhet me çamët. Është i saktë ministri kur thotë nuk njohim një çështje çame,” tha kryeministri Rama.
