Përfaqësuesi i Athinës për politikë të jashtme, Nikos Kotzias në mbledhjen e këshillit për punë të jashtme të BE-së, njoftoi se kryeministri Edi Rama do të takohet me homologun e tij grek, Aleksis Tsipras. Takimi mes dy krerëve të qeverive respektive do të zhvillohet gjatë forumit ekonomik botëror që mbahet në Davos nga data 23 deri më 26 janar.
“Informova kolegët e mi për negociatat 3-ditore që mbajtëm në Shqipëri, pas negociatave 4-ditore të zhvilluara në Kretë. Unë i informova ata se negociatat në Shqipëri ishin të suksesshme dhe u dakordësuam në pika ku kishim mosmarrëveshje dhe për çështje të mbetura pezull në 70 vitet e fundit”, shkruhet mes tjerash në një deklaratë të ministrisë së jashtme të Greqisë.
Ndërsa nënvizohet se këto zhvillime do të konfirmohen në takimin mes Ramës dhe Tsipras.
“Ramë dakord për çështje për të cilat kishte mosmarrëveshje dhe ishin të pazgjidhura për 70 vjet dhe kjo ka sjellë edhe si rezultat takimin që do të kenë në Samitin e Davosit të Zvicrës pasnesër kryeministrat Tsipras dhe Rama. Dëshiroj edhe një herë të shpreh publikisht kënaqësinë time për faktin se, në bazë të marrëveshjeve qe kemi bërë në Kretë, në paketën e çështjeve qe perballojne Greqia dhe Shqipëria, qeveria shqiptare kishte kurajë dhe përgjegjësi politike për të votuar dy ligje zbatuese, për sa i përket marrëveshjes qe kishte bërë me qeverinë greke në vitin 2009″, është shprehur kreu i diplomacisë greke.
Gjithashtu Koztias ka theksuar se ndërsa ndodhej në samit me homologët e tij europianë, në Dragot janë gjetur qysh ditën e parë gjatë punimeve të filluara, eshtrat e dy ushtarëve grekë dhe sipas tij, ky është një çast prekës për të gjithë të afërmit dhe për grekët kudo ata ndodhen.
Koztias ka theksuar se vlerëson shumë faktin që më në fund qeveria shqiptare vazhdon me hapa të guximshme për të përmbushur ato për të cilat është rënë dakord, ashtu siç duhet të bëjë edhe pala greke.
