Presidenti i Olympique Lyon pak para se të zhvillohet përballja mes klubit të tij dhe PSG, ka ngritur zërin kundër gjigantit parisien. Jean-Micheal Aulas këtë herë e ka me financat dhe me qëllimin që ka PSG me drejtuesit e tij sheikë. Ai i ka etiketuar se ata janë duke lobuar dhe investuar shumë për të fituar Champions League dhe kjo ka lidhje me Botërorin që do të organizohet në Qatar.
“Nuk dua të etiketohem si antiparisien, anti PSG, apo anti Nasser. Unë i them gjërat, si zakonisht, pak përpara të tjerëve dhe pa u frikësuar se mos më tërheqin veshin. Në një ambient kur PSG dëshiron të fitojë për arsye gjeopolitike trofeun e Champions League, inflacioni i gjeneruar në Francë nga PSG është një inflacion artificial, sepse fondet e përdorura janë të një shteti tjetër. PSG tenton të barazojë dhe parakalojë klubet e tjera të pushtetshme, por janë klubet ato që menaxhojnë burimet e tyre. Neymar, unë nuk e dinë nëse ai është 100% punonjës i PSG, apo punonjës i pjesës së Qatar për Kupën e Botës”, deklaroi ai në të përditshmen “Aujourd’hui en France.
Me këto fjalë presidenti i Lyon hedh dyshime mbi blerjen e Neymar, që është edhe lojtari më i shtrenjtë në histori. Por ai ka hedhur poshtë se ka ndonjë akuzë të drejtpërdrejtë për presidentin e PSG, Nasser Al-Khelaifi: “Unë nuk e kam me Nasser, unë luftoj sistemin që ai përfaqëson. Ajo që është në qendër të akuzave të mia është struktura drejtuese e futbollit francez që legjitimon këtë stil aferash”.
Pas publikimit të fjalës së presidentit të Lyon, ishte klubi i PSG ai që reagoi, duke preferuar të përdorë rrjetet sociale. Kështu, në llogarinë zyrtare të klubit në “Twitter”, parisienët u përgjigjën në mënyrë ironike: “Pas lajmit të gënjeshtër të sotëm nga JM AUlas përpara përballjes OL-PSG, vetëm një pyetje: A jeni gati të thyeni rekordin sezonal të frekuentimit, publicitetit dhe përfitimeve duke mirëpritur PSG në shtëpi?”
