Institucioni akuzës në vend është “shkundur” nga themelet. Kanë kaluar vetëm tre javë që kryeprokurorja Arta Marku ka marrë detyrën dhe në Prokurori kanë ndodhur ndryshime drastike. Janë larguar, transferuar dhe ulur në detyrë persona me shumë peshë nga institucioni akuzës.
Në periudhën kur Arta Marku ishte kandidate për kryeprokurore të përkohshme, para Komisionit të Ligjeve deklaroi se Prokuroria është në kaos dhe se ajo është e aftë për t’i rikthyer normalitetin. Më tej, kandidatja theksoi se prokurorët janë të hutuar, të demotivuar, pasi sipas saj, emërimet nuk kanë lidhje me meritat.
“E shoh Prokurorinë në kaos dhe kam aftësinë të kthej normalitetin. Prokurorët janë të hutuar, të demotivuar, pasi emërimet nuk kanë lidhje me meritat. Në sistem ka prokuror me integritet e moral, që mund t’i japin sistemit shumë“, deklaronte Marku kur aspironte të bëhej kryeprokurore(lajmin e plotë lexoje këtu).
Gazetarja Klodiana Lala tha sot se kryeprokurorja e përkohshme Arta Marku ka bërë veprime të pa tolerueshme jashtë kompetencave të saja duke pasur ndikime politike (lajmin e plotë lexoje këtu).
Ndërkohë kryetari i Partisë Demokratike, Lulzim Basha tha sonte largimi i prokurorëve është një “ushtrim detyre” i mirë organizuar nga qeveria Rama (lajmin e plotë lexoje këtu). 
Marku me siguri thotë se po zbaton premtimet e saj, por disa nga lëvizjet më të bujshme të cilat kanë hapur mjaft debate deri sa dy prej të larguarve bënë kallëzime penale për kryeprokuroren. Lista e plotë e të larguarve është si më poshtë:
Agron Gjanaj, Drejtues i Prokurorisë së Rrethit Gjyqësor Durrës, largohet nga kjo detyrë dhe caktohet në pozicion të përkohshëm si prokuror në Prokurorinë e Rrethit Gjyqësor Pukë. Drejtues i Përkohshëm i Prokurorisë së Rrethit Gjyqësor Durrës, caktohet Donika Prela, aktualisht prokurore pranë kësaj prokurorie.
Dritan Gina, Drejtues i komanduar i Prokurorisë së Rrethit Gjyqësor Elbasan, i ndërpritet komandimi dhe kthehet si prokuror në Prokurorinë ku është i emëruar; Drejtues i Përkohshëm i Prokurorisë së Rrethit Gjyqësor Elbasan, caktohet prokurori, Ardjan Nezha. Ish-drejtuesi i Prokurorisë së Elbasanit, Dritan Gina ka bërë gati kallëzimin penal për Kryeprokuroren Arta Marku(lajmin e plotë lexoje këtu).
Pali Deçolli, Drejtues i komanduar i Prokurorisë së Rrethit Gjyqësor Fier, i ndërpritet komandimi dhe kthehet si prokuror në Prokurorinë ku është i emëruar; Drejtues i Përkohshëm i Prokurorisë së Rrethit Gjyqësor Fier, caktohet prokurori, Fatmir Lushi.
Artur Ismailukaj, Drejtues i komanduar i Prokurorisë së Rrethit Gjyqësor Kukës, i ndërpritet komandimi dhe kthehet si prokuror në Prokurorinë ku është i emëruar; Drejtues i Përkohshëm i Prokurorisë së Rrethit Gjyqësor Kukës, caktohet prokurori, Alketa Nushi.
Gjithashtu, kryeprokurorja Arta Marku ka bërë dhe zëvendësime në Tiranë dhe në Prokurorinë e Përgjithshme.
Fjorida Ballauri, Drejtoresha e Kabinetit në Prokurorit të Përgjithshëm, u zëvendësua nga Alketa Zifla.
Albi Seriani, Shefi i Zyrës së shtypit për Prokurorinë e Përgjithshme u zëvendësua nga Denion Ndrenika.
Rovena Gashi, Drejtoreshë në zyrën e Marrëdhënieve me Jashtë, e cila ka qenë protagonistja e zbatimit të ligjit të dekriminalizimit u zëvendësua nga Arqile Kocaj. Prokurorja Rovena Gashi ka paditur Prokuroren e Përgjithshme, Arta Marku (lajmin e plotë lexoje këtu).
Petrit Fusha Drejtues i Prokurorisë së Rrethit Gjyqësor Tiranë, u zëvendësua nga Dritan Rreshka. TIRANA TODAY
