Megjithëse nuk e votoj në parlament dhe tha se nuk e njeh kryeprokuroren e përkohshme LSI i dërgon sot një kërkesë. Lëvizja Socialiste për Integrim i ka dërguar sot një letër kryeprokurores Arta Marku ku kërkon informacion për aktpadinë e depozituar prej tyre në lidhje me zgjedhjet e 25 qershorit.
LSI pretendon se është përdorur Policia e Shtetit në fushatën e Kuçovës, duke akuzuar kështu kryeministrin e vendit Edi Rama për veprime antiligjore dhe antikushtetuese.
Nga qyteti i Kuçovës, gjatë fushatës elektorale Rama u bëri thirrje policëve dhe mësuesve që pas orarit të punës të kërkojnë votat për PS për të vazhduar reformat dhe jo të kthehen në kohën e Saliut.
” I bëj thirrje të gjithë punonjësve të Policisë së Shtetit, në momentin që lënë uniformën, pas punës të përkushtohen për të marrë sa më shumë vota për PS-në, në mënyrë që të mos lejojmë rikthimin e hijes së turpit mbi uniformën e tyre” tha Rama.
Pesë ditë para zgjedhjeve të 25 qershorit, LSI ka paditi ish-aleatin e saj, kryeministrin Edi Rama në Prokurori. Burime zyrtare nga LSI deklaruan se padia vjen pasi “kryeministri shkeli ligjin kur ftoi policinë të marrë vota për PS”. Jo vetëm kaq, por në deklaratën e saj, LSI shkruan ndër të tjera se “këto deklarata të Ramës tregojnë qartë se Kryeministri nuk është në gjendje të qëndrueshme mendore”(lajmin e plotë lexoje këtu).
