Kreu i grupit parlamentar të Partisë Socialiste, Taulant Balla njoftoi për ndryshimet në strukturën e sekretariatit në PS, duke folur dhe mbi ecurinë e zgjedhjeve në parti. Deklarata e Ballës u bë nga mbledhja e Asamblesë Kombëtare të PS-së, ku u diskutua për një nga pikat e rëndësishme të mbledhjes, lidhur me ndryshimet në strukturën e sekretariatit.
“Sa i takon ndryshimeve në strukturën e sekretariatit, duhet të jemi të qartë se jo të gjithë kanë punuar me efikasitet. Ka nga ata që nuk i kanë kryer detyrat dhe funksionet e tyre. Por edhe me propozim të kryeministrit, i kërkoj Asamblesë që t’i jepet një mundësi e dytë. Ndërkohë i propozojmë Asamblesë së partisë shtimin e dy detyrave të reja, atë të sekretarit për marrëdhëniet ndërkombëtare, ku propozojmë Teuta Vodën, aktualisht zv.ministre e Drejtësisë, e cila ka një përvojë të shkëlqyer në Parlamentin Evropian.
Sekretari për çështjet zgjedhore, propozojmë që të jetë Bledi Çuçi.
Ndërkohë që Blerina Gjylameti do të vazhdojë detyrë në sekretariatin për Koordinimin elektoral, detyrë që e ka kryer më së miri deri më tani.
Sakaq, propozojmë Gramoz Ruçi të jetë anëtar i Kryesisë së partisë”, tha kreu i grupit parlamentar të PS, Taulant balla.
