Ambasada e Shteteve të Bashkuara të Amerikës në Ankara ka bërë të ditur se shërbimet e vizave në Turqi do të rifillojnë plotësisht.
Në deklaratën nga ambasada amerikane bëhet me dije se që nga muaji tetor e deri tani, autoritetet turke nuk kanë filluar ndonjë hetim të ri për punonjësit lokalë në misionet diplomatike amerikane në Turqi.Siç theksohet nga ambasada, autoritetet turke kanë respektuar garantimin e dhënë në nivel të lartë se nuk do të arrestojnë punonjës lokalë të ambasadës ose konsullatave amerikane në Turqi.
Ambasada bën të ditur se nëse autoritetet e Turqisë synojnë të arrestojnë ndonjërin nga punonjësit në misionet diplomatike të SHBA-ve në Turqi në të ardhmen, atëherë ato së pari duhet t’i njoftojnë autoritetet amerikane para se të ndërmarrin hap.
“Bazuar në garantimin në fjalë, Departamenti Amerikan i Shtetit beson se gjendja e sigurisë është përmirësuar mjaftueshëm për të rifilluar plotësisht dhënien e shërbimeve për viza në Turqi”, thuhet në deklaratën e ambasadës.
Ambasada e Turqisë në Washington deklaratë
Ambasada e Turqisë në Washington njoftoi se ka hequr kufizimet ndaj vizave kundrejt shtetasve amerikanë, si përgjigje ndaj vendimit të SHBA-ve.
Kriza e vizave mes Turqisë dhe SHBA-ve shpërtheu më 8 tetor, kur ambasada e SHBA-ve në Ankara njoftoi pezullimin e shërbimeve të vizave për jo-migrantë për shtetasit turq, pas arrestimit të Metin Topuz, punonjës lokal në konsullatën amerikane në Stamboll, nën hetime për lidhje me organizatën terroriste FETO.
Ky hap shkaktoi kundërpërgjigje të njëjtë edhe nga Ankaraja.
