Kalimi nga mazhoranca në opozitë, duket se ndikon drejtpërdrejt te politikanët tanë, duke bërë që shpesh ata të ndryshojnë qëndrim nga ekstremi në ekstrem. Duket se i tillë është edhe rasti i ish-ministrit të Bujqësisë, Edmond Panariti.
Vetëm para 6 muajsh, ishte pikërisht ministri në detyrë në atë kohë Edmond Panariti, ai që reklamonte teknologjitë në një fabrikë qumështi, duke i cilësuar ato si siguri jo vetëm për shëndetin e shqiptarëve, por edhe për më gjerë, teksa sugjeronte hapjen e eksporteve në tregjet rajonale, por jo vetëm.
“Sot vizitova një fabrikë ikonë të përpunimit të qumështit dhe nënprodukteve të tij, e cila garanton cilësinë por edhe sigurinë ushqimore. Produktet e qumështit, edhe me teknologjinë tetrapak, të synojnë eksportet dhe janë të gatshme, duke garantuar cilësi e siguri. Industria jonë moderne e grumbullimit dhe përpunimit të qumështit, falë dhe mbështetjes tonë financiare, e shkëputi përfundimisht këtë produkt nga buza e rrugës dhe trotuaret. Sot qumështi, kosi, djathi e nënproduktet, kanë vetëm fizionomi e standarde evropiane”, shprehej Panariti në muajin maj të 2017-ës.
Sigurisht, në atë periudhë ai ishte ministër i Bujqësisë dhe nuk kishte si të “shante” cilësinë e produkteve të qumështit. Madje, siç citohet më sipër, ai jepte edhe garanci, teksa deklaroi se industria moderne e shkëputi përfundimisht qumështin nga buza e rrugës dhe trotuarit.
Por, sot ai alarmoi thuajse të gjithë shqiptarët, pasi tashmë jo në qeveri, bëri një akuzë shumë të fortë, teksa tha se qumështi vendas rezulton me substancë kancerogjene.
Panariti shkoi më tej, teksa kërkoi që të bllokohet menjëherë prodhimi ose të tërhiqen nga tregu produktet e përlyera, në të kundërt ai kërkon nisjen e menjëhershme të hetimit nga prokuroria.
“Ose nje megaskandal, ose nje supermashtrim!! Mbetet per tu pare.?! .. Para disa ditesh ne nje studim te AFI, gjysma e mostrave te qumeshtit vendas te analizuara dolen me aflatoksine. Aflatoksina eshte substance kancerogjene e fuqise shume te larte, e pa zberthyeshme dhe rezistente ndaj perpunimit termik. Prania e saj ne qumesht dhe nenprodukte eshte rrezik shume i madh per shendetin e konsumatorit. MB dhe AKU duhet te bejne urgjent publike fermat apo subjektet prodhuese te ushqimeve te ndotura , te bllokojne prodhimin dhe te terheqin urgjent nga tregu produktet e perlyera. Sa me pare dhe menjehere!!! Nderkohe AFI te beje publike rezultatet e analizave, metodat e analizes dhe laboratoret e references qe i kane kryer ato. Nese kjo nuk ndodh atehere prokuroria te nis hetimin e menjëhershëm dhe te percaktoje përgjegjësite ose eventualisht mashtrimin sic ka ndodhur me pare ne dem te prodhuesve vendas, per te favorizuar importet”, shkruante sot Panariti.
Pra, kemi të bëjmë me një standard të dyfishtë të ish-ministrit Panariti brenda 6 muajsh.
Mbase Panariti harroi të na jepte disa detaje të rëndësishme, si për shembull sa kohë ka që shqiptarët konsumojnë qumësht me aflatoksinë? Mos ndoshta ky problem ka qenë aktual edhe para 6 muajsh, kur në krye të ministrisë së Bujqësisë ishte Panariti, i cili në atë kohë jepte sigurinë maksimale për qumështin dhe nënproduktet e tij? TIRANA TODAY
