Një ngjarje aspak e këndshme ndodhi dje gjatë ndeshjes Përmeti-Këlcyra, ku lojtarët e këtij të fundit kanë ushtruar dhunë ndaj arbitrave.
Gjithçka ka filluar pas një penalltie të akorduar nga arbitri, në favor të ekipit të Përmetit, gjë që ka shkaktuar reagimin e lojtarëve të Këlcyrës. Këta të fundit kanë shkuar të gjithë së bashku për të protestuar të arbitri, ndërsa në gjaknxehje e sipër, situata ka degraduar deri në dhunë fizike.
Policia ka ndërhyrë menjëherë për të qetësuar gjendjen, por vazhdimi i lojës ka qenë i pamundur.
Sot, u bë arrestimi në flagrancë i tre lojtarëve të Këlcyrës, konkretisht shtetasit me iniciale E.K,30 vjeç, A.H, 21 vjeç si dhe M.Xh, 21 vjeç, banues në Përmet.
Ata akuzohen se në pjesën e dytë të ndeshjes Përmeti-Këlcyra, kanë goditur me shkelma dhe grushte gjyqtarët e kësaj ndeshje, gjyqtarët e takimit, shtetasin Alvi Paçon dhe A.K.
Por, sa rrezikojnë lojtarët për shkak të gjaknxehjes së tyre në minutat e fundit të ndeshjes?
Duke iu referuar nenit 237 të Kodit Penal, personat që godasin punonjësin që kryen një detyrë shtetërore apo një shërbim publik, për shkak të veprimtarisë së tij shtetërore apo të shërbimit, dënohen me gjobë ose me burgim gjer në tre vjet.
Nuk dihet nëse lojtarët në fjalë do ia hedhin paq me vetëm një gjobë, apo do të dënohen me burgim, ndërsa kjo mbetet për t’u parë në vijim kur ata të dalin para trupit gjykues.
