Përmbytjet dhe rrëshqitjet e tokës në ishullin indonezian të Javës, kanë lënë pas 25 persona të vdekur.
Lajmi është konfirmuar për mediat nga agjencia përgjegjëse për menaxhimin e katastrofave. Cikloni “Cempeka” pothuajse ka rrënuar distriktin e Pacitanit në provincën lindore të Javës. Nga kjo situatë e rëndë natyrore janë evakuuar mbi 2000 persona, ndërsa 1700 shtëpi janë shkatërruar tërësisht.
Dëme të konsiderueshme raportohen në shumë ferma që mbarështojnë lopë dhe dele, por disa të tjera janë shkatërruar tërësisht. Ndërkohë ekipet e shpëtimit janë në terren dhe po punojnë për të shpëtuar sa më shumë jetë njerëzish që të jetë e mundshme.
