Kryetari i Partisë Demokratike, Lulzim Basha ka bërë të ditur disa nga propozimet e opozitës, të cilat do i paraqesë nesër në Kuvend si amendamente, ndërsa e cilësoi ditën e nesërme një ditë beteje parlamentare për opozitën.
Sipas Bashës, Rama ka ndërmend të finalizojë nesër në Kuvend atë që ai e quan “buxhetin e pastrimit të parave”, ndërsa deklaroi se PD do të jetë kundër këtij projektbuxheti.
“Edi Rama ka ndërmend të finalizojë nen për nen buxhetin e pastrimit të parave. Qëndrimi i opozitës është i qartë, kundër këtij projektbuxheti, që duhet të jetë i fundit për këtë qeveri.
Ne nuk duhet të lejojmë të zbatohet, nesër në parlament ne do të paraqesim amendamentet në kuvend që synojnë të zhbëjnë sistemin kriminal të taksave që është ndërtuar në këto vite”, tha Basha.
Por, cilat janë propozimet e opozitës për të ndaluar Ramën?
“Propozimet e PD për të ndaluar projektin e Ramës:
PD propozon taksën e sheshtë 9%, TVSH 15%, pragu për tvsh e biznesit të vogël 12 mln lekë në vit, heqja e taksës së qarkullimit që ul çmimin e karburantit me 200 lekë për litër, rritje e fondit për pagat dhe pensionet, ndihmës sociale, të përndjekurit.
Subvencionet për fermerët 15 mln euro. Rritja e pagave dhe pensioneve të mbahen në të njëjtin nivel si në vit elektoral.
Rritje me 20% e fondit të ndihmës ekonomike. Librat e financuar nga buxheti deri në klasë të 9.
Synimet e PD janë të frenojmë buxhetin kriminal të pastrimit të parave të pista, të bëjmë gjithçka për të shkurtuar mandatin e një qeverie që ka lidhur fatin politik me interesat kriminale dhe të drogës”, deklaroi ndër të tjera kryedemokrati.
