Zbulohen të tjera detaje që hedhin dyshime të forta mbi funksionimin e radarëve. Radarët janë në përgjegjësinë së Ministrisë së Mbrojtjes por dhe të Policisë së Shtetit. Portali “Tpz.al” ka publikuar dokumentet e një tenderi që mund të konsiderohet si skandali i radhës nga Policia e Shtetit. Kjo e fundit, para pak ditësh, ka hapur një tender, pikërisht për zhvendosje radari, nga Vlora drejt zonës së quajtur Hoxharë, në territorin e qytetit të Fierit.
Sipas këtyre dokumenteve, Drejtoria Vendore e Kufirit dhe Migracionit Vlorë, ka lëshuar një urdhër prokurimi me numër 42, i datës 09 nëntor 2017. Në të thuhet se kjo drejtori, me fondet e vëna në dispozicion për vitin 2017, të përdoret procedura e prokurimit me vlerë të vogël me objekt “spostimi dhe mbrojtja nga deti të radarit dhe rivendosjen e tij në një pozicion të ri, në SPK Hoxharë Fier. Ky tender ka një fond limit 231.160 lekë pa TVSH ndërsa dokumenti është firmosur nga kryekomisari Luan Hysenj.
Ky mund të jetë një hije skandali nga Policia e Shtetit, pasi indirekt po i hap rrugën trafikantëve të drogës, duke lënë bregdetin e Vlorës pa radarë. Mësohet se tenderi është bërë më datë 14.11.2017 ora 09.00, ndërsa Tpz.al do e ndjekë edhe në vijim këtë çështje, nëse bregdeti i Vlorës është i zbuluar nga kontrolli i Policisë së Shtetit.
Dhjetëra tonë me hashash janë sekuestruar në brigjet italiane nga Guardia di Finanza. Tonelatat niseshin lehtësisht nga brigjet shqiptare, kryesisht nga bregdeti i Vlorës. Në të gjitha rastet, radarët shqiptarë nuk pikasnin skafet, ndërsa ishte Policia e italiane që i identifikonte trafikantët e drogës, në bregdetin e saj.
Mjetet policisë italiane viheshin në ndjekje të “piratëve” shqiptarë. Por, pas këtyre aksioneve, me të drejtë lindën dyshime për radarët e policisë dhe ushtrisë shqiptare. Fletë-arrestet e fundit të 3 ish-drejtuesve të Policisë së Shtetit në qarkun e Vlorës, vërtetuan se mes trafikantëve dhe strukturave të veçanta në polici ka patur bashkëpunim për trafikimin e lëndëve narkotike.
Ndërkohë pak javë më parë, ish-ministrja e Mbrojtjes, Mimi Kodheli, deklaroi në emisionin “Të Paekspozuarit”, se radarët e vendit nuk ka qenë asnjëherë të programuar për të identifikuar trafikantët e drogës.
“Në vitin 2006 më të drejtë qeveria e asaj kohë, duke qenë së Shqipëri po përgatitej që do futej në NATO, kufijtë detar shqiptarë do ishin kufijtë e NATO-s. Kështu që, NATO bleu disa radarë që mbrojnë kufijtë territorial detar të Republikës. Radarët kanë qenë të programuar kush vjen nga jashtë dhe hynë në territorin shqiptar, nuk ka qenë të programuar këto radarë për këtë gjë” – u shpreh ish Ministrja e Mbrojtjes.
Kodheli shkoi edhe më tej, duke thënë se ushtritë në botë nuk merren me trafikantë droge.
“Nuk ka ushtri në botë që merret me trafikantë. Pra, asnjë ushtri e NATO-s nuk merret me trafikantë. Dhe ajo kontratë që ka kaluar në parlament për blerjen e radarëve është e programuar të shikojë një gjë metalike, jo plastike”– tha ish Ministrja e Mbrojtje.
Kodheli tregoi gjithashtu një ngjarje të paprecedentë, kur ajo kishte marrë detyrën në vitin 2013. Sipas, saj radarët detarë kanë qenë të fikur që nga viti 2012 deri në shtator 2013, duke regjistruar kështu skandalin më të madhe në Sigurinë Kombëtare.
“Kur kam marrë detyrën ka qenë niveli i ulur i gatishmërisë në det, e kam hasur direkt sa mora detyrën, ku kam marrë edhe një letër nga ajo kohë që më njoftonte që puna e radarëve ishte në nivelin 20 për qind. Pra 80 për qind nuk punonin, dhe po ashtu inekzistente ishte edhe mundësia për të patrulluar mjetet lundruese pasi nuk kishte karburant. Nga 2012 deri në shtator 2013, deti ishte jashtë kontrollit, totalisht ishte në tokë” – përfundoi Kodheli, e ftuar në emisionin “Të Paekspozuarit” në datën 2 nëntor 2017.
