Ka nisur nga qyteti i Fierit operacioni “Forca e Ligjit”. Në një deklaratë për mediat, drejtori i Policisë Fier Albert Nushi ka deklaruar se në kuadër të operacionit “Grand” janë arrestuar 3 persona, anëtarë të një grupi kriminal në fushën e narkotikëve, vrasjeve e rrëmbimeve.
Ndërkohë shtetasit që kanë përfunduar në pranga janë:
Kujtim Kuçi, 45 vjeç, banues në fshatin Sulaj, Fier
Bashkim Ahmeto (Kuçi), 43 vjeç, banues në fshatin Sulaj, Fier
Dritan Tusha 47 vjeç, lindur dhe banues në Shijak.
Arrestimi i tyre u bë gjatë një kontolli blic të policisë në lokalin e shtetasit Kujtim Kuçi. “Shtetasit e ndaluar, si anëtarë të grupit të strukturuar kriminal, dyshohet se ndër vite në bashkëpunim me njëri-tjetrin kanë trafikuar lëndë narkotike të llojit kokainë, heroinë dhe kanabis sativa, brenda dhe jashtë Shqipërisë”, njofton policia.
Nga hetimet e deritanishme, ky grup kriminal që operonte kryesisht në zonën e Fierit, dyshohet se ka qënë i përfshirë në disa ngjarje të rënda si vrasje, rrëmbim personi, për të cilat po vijojnë hetimet intensivisht.
Paralelisht me hetimin penal, policia ka nisur edhe hetim për të gjitha pasuritë që zotërojnë anëtarët e grupit, të dyshuara si produkt i pastrimit të veprës penale të kryer prej tyre.
