Pohimet e komisionit janë të pabazuara, çorientuese dhe të gabuara. Kështu ka deklaruar ambasada amerikanë në Prishtinë për raportin e komisionit të ri për kufirin midis Kosovës dhe Malit të Zi.
E zhgënjyer nga ky raport, ambasada amerikane u ka bërë thirrje institucioneve të Kosovës që të ratifikojnë marrëveshjen për shënimin e kufirit me Malizin e Zi.
Sipas një komunikate të ambasadës amerikane në Prishtinë, marrëveshja ekzistuese pasqyron një proces të saktë të përcaktimit të kufirit, të konfirmuar nga komisioni shtetëror i Kosovës dhe ekspertë të shumë të njohur ndërkombëtarisht.
“Në vitin 2015 Departamenti i Shtetit konfirmoi se marrëveshja origjinale saktësisht pasqyronte vijën kufitare që ka ekzistuar mes Kosovës dhe Malit të Zi që nga viti 1974. Që nga atëherë nuk kanë dalë fakte që do ta vinin në dyshim atë vendim. Vënia në dyshim e marrëveshjes dhe zvarritja e procesit të ratifikimit kërcënojnë marrëdhëniet e Kosovës me fqinjët e saj dhe me Bashkimin Evropian dhe e lënë Kosovën e qytetarët e saj të izoluar”, thuhet në komunikatën për mediat.
Gjithashtu ambasada u bëri thirrje politikanëve të Kosovës që “të shikojnë përtej interesave personale partiake dhe politikës partiake, dhe që të përqendrohen në nevojat e qytetarëve të tyre duke e ratifikuar marrëveshjen ekzistuese sa më shpejtë që është e mundur”.
Ndërkohë një ditë më parë, zyrtarë të komisionit për shënimin e kufirit u shprehën se përdorimi i dokumenteve kadastralë për këtë çështje, ka bërë që Kosova të humbasë territor. Madje ata paralajmëruan edhe për një raport të hollësishëm me gjetjet që sipas tyre, e vërtetojnë këtë pohim.
Kujtojmë se ky komision i ri për rivlerësimin e vijës kufitare me Malin e Zi është krijuar me vendim të qeverisë së kryeministrit Ramush Haradinaj, i cili vazhdon të jetë një nga kritikuesit më të mëdhenj të marrëveshjes së arritur.
Marrëveshja e nënshkruar në fund të gushtit të vitit 2015 është ratifikuar vetëm nga parlamenti i Malit të Zi. Për këtë, zyrtarët në Podgoricë shprehen se ajo është përfundimtare dhe se nuk mund të rinegociohet.
Por kjo marrëveshje nuk është ratifikuar nga Kosova për shkak të mospajtimeve që çuan edhe në skena të dhunshme në parlament dhe jashtë tij. Kundërshtarët e marrëveshjes pohojnë se Kosova humb mbi 8 mijë hektarë tokë.
Mos ratifikimi i kësaj marrëveshjeje që është kusht për liberalizimin e vizave ka bërë që Kosova të jetë e vetme në rajonin e Ballkanit perëndimorë, qytetarët e së cilës duhet të kërkojë viza për të udhëtuar në vendet e Bashkimit Evropian.
