Emisioni “Opinion” sonte ju përkushtua diskutimit se sa ndihmojnë dhe dhurojnë shqiptarët. Në bashkëpunim me “Fundjavë Ndryshe” në emision është ndërmarrë nisma për të ndihmuar një familje që është në nevojë. Është hera e dytë që emisioni “Opinion” dhe fondacioni “Fundjavë Ndryshe” bashkëpunojnë dhe ndihmojnë një familje të varfër. E njëjta gjë ka ndodhur një vit më parë ku një familje në periferi të Vaqarrit në Tiranë mundi te fitonte një banesë komode.
Familja që ka evidentuar fondacioni “Fundjavë Ndryshe” përbëhet nga shtatë persona në Thanasaj të Lushnjës e cila jeton në kushte mjaftë të vështira. Kryefamiljari Dritan Bicaku tregon se është i sëmurë por dhe të tjerët nuk e marrin në punë.
Drejtori i fondacionit, Arbër Hajdari tha se shtëpia do të shembet dhe do të ndërtohet e re nga e para. Ai shtoi se ka kërkuar ndihmën e kushërinjve të familjes fillimisht pastaj të donatorëve dhe të tjerë.
Arbër Hajdari: Këtë shtëpinë do ta shembim sepse muret nuk mbajnë. Ne do ta rindërtojmë nga e para, por shpresojmë të mos kemi probleme me lejet e ndërtimit megjithëse shtëpia është ekzistuese në kadastër. Për dy vite fondacioni “Fundjavë Ndryshe” ka arritur të mbledh 3 miliardë lekë, janë ndërtuar mbi 40 shtëpia për këto dy vite. Shqiptarët janë bamirës por duhet të gjesh rrugën e duhur si ti motivosh dhe t’i nxisësh që të bëjnë bamirësi. Në kemi kontaktuar me familjarët e kësaj familje që jetojnë në Angli dhe u kemi kërkuar atyre që të ndërtojmë së bashku shtëpinë.