Vijojnë hetimet intensive ndaj ish-ministrit të Brendshëm, Saimir Tahiri. Prokuroria e Krimeve të Rënda është duke bërë hetime në disa pista hetimi por duke u përqendruar në ato që kanë dalë dhenta përgjimet e prokurorisë italiane.
Kontrolli i banesës të Tahirit ishte diçka që u transmetua live nga mediat shqiptare në momentin kur u futen dhe kur dolën inspektoret e prokurorisë. Por në media nuk u publikua se cilat janë pistat e tjera të hetimit.
Nga të gjitha mediat po ndiqet me intensitet çështja Tahiri. Uebsajti “Balkanweb” duke iu referuar burimeve shkruan se oficerët e policisë gjyqësore kanë qenë në Ministrinë e Brendshme në fundjavë ku kanë marrë librin e hyrje-daljeve.
Veprimi i Prokurorisë vjen pas bisedës së përgjuar mes dy vëllezërve Florian dhe Moisi Habilaj në kuadër të operacionit “Rosa dei venti”, ku Floriani shprehet ndër të tjera se kishte takuar në Tiranë “shefin e madh”. Nisur nga akuzat e bëra nga Krimet e Rënda që kërkuan arrestimin e Tahirit, dyshimet e Prokurorisë janë se pikërisht ish-ministri është ‘shefi i madh’ për të cilin flisnin vëllezërit Habilaj.
Madje, sipas burimeve nga Prokuroria dyshohet se takimi mes tyre është bërë në Ministrinë e Brendshme, ndaj është sekuestruar edhe libri i hyrje-daljeve për të verifikuar këto dyshime.
