Bashkimi Evropian ka ngritur alarmin mbi presionin e madh që po përjeton Ballkani për shkak të propagandës ruse. Vendet anëtare të Unionit kanë nënshkruar një letër duke iu dërguar kryediplomates së Bashkimit Evropian Federica Mogherini. Në letër kërkohet që shërbimi diplomatik i Brukselit (EEAS) të zgjerojë aktivitetet për pengimin e propagandës ruse – sidomos në Evropën juglindore dhe në Ballkanin perëndimor, shkruan EUobserver.
Fillimisht letra është nënshkruar nga Kroacia, e cila është pasuar nga Çekia, Letonia, Lituania, Polonia, Rumania, Suedia dhe Britania e Madhe.
Në letër kërkohet që të fillojnë të punojnë me kapacitet të plotë edhe dy filiale të StratCom-it për Ballkanin jugor dhe perëndimor. Nga BE kërkohen më shumë para për të investuar në teknologji inovative. EUobserver thekson se shtetet e përmendura gjenden në “vijën e parë” të asaj që e quajnë “fushatë të sofistikuar dhe intensive e aktorëve të jashtëm me qëllim që të gjenerohet mosbesim dhe pakënaqësi ndaj rendit demokratik, të diskreditohet BE, komuniteti transatlantik dhe partnerët evropianë si dhe të dobësohet uniteti evropian”.
Disa diplomatë theksojnë se StratCom u themelua me insistimin e Donald Tuskut, presidentit të Këshillit Evropian, ndërsa Mogherini “as atëherë nuk ka treguar ndonjë interesim të madh”. Diplomatja italiane Mogherini para se të bëhej shefe e diplomacisë së BE-së ishte kritikuar për qëndrime proruse apo naive ndaj Kremlinit. Për StratCom punojnë vetëm 14 persona, prej tyre dhjetë janë diplomatë të shteteve anëtare.
