Kryetari i Kuvendit, Gramoz Ruçi pritet të marrë në shqyrtim kërkesën e Prokurorisë së Krimeve të Rënda për heqjen e imunitetit të deputetit Saimir Tahiri në orën 19:00. Pritet të mblidhet Këshilli për Mandatet dhe Rregulloren që të marrë në shqyrtim kërkesën e kryeprokurorit Llalla.
Mësohet së kryetari i Kuvendit, Gramoz Ruçi dhe kryetari i gripit parlamentar të Partisë Socialiste, Taulant Balla ndodhen tani në selinë e kuvendit ku pritet mbledhja e gripit.
Sot, Prokuroria e Krimeve të Rënda në shkresën e dërguar Kuvendit të Shqipërisë, kërkon autorizimin për heqjen e imunitetit të deputetit Saimir Tahiri, në vijim të një hetimi të nisur për veprat penale të “Trafikut të narkotikëve”, kryer në bashkëpunim, në formën e posaçme të grupit të strukturuar kriminal dhe “Korrupsionit pasiv të zyrtarë të lartë shtetërore dhe të zgjedhurve vendorë”, parashikuara nga nenet 283/a/2 dhe 260 të Kodit Penal.
Kjo kërkesë vjen pas përfshirjes së Saimir Tahirit në dosjen “Habilaj”, ku deputeti dyshohet si i përfshirë në trafikun e drogës.
Prokuroria për Krime të Rënda po zhvillon hetime, në bashkëpunim me autoritetet italiane.
Në bazë të të dhënave të përftuara në kuadër të këtij hetimi, Prokuroria për Krime të Rënda kërkon nga Komisioni i Mandateve në Kuvendin e Shqipërisë dhënien e autorizimit për “arrestimin, heqjen e lirisë dhe kontrollin personal e të banesës” për deputetin Saimir Tahiri
