Menjëherë pas kërkesës së Prokurorisë për Krimet e Rënda në lidhje me heqjen e imunitetit të Tahirit, kanë mbërritur në Kryesi kreu i Kuvendit Gramoz Ruçi dhe kreu i grupit parlamentar të Partisë Socialiste, Taulant Balla.
Zyrtarisht nuk ka ende një njoftim zyrtar për mbledhjen e Këshillit për Mandatet dhe Imunitetin, por mendohet se kjo mbledhje do të zhvillohet pasditen e sotme.
Në shkresën e dërguar Kuvendit të Shqipërisë, Prokuroria për Krime të Rënda kërkon autorizimin për heqjen e imunitetit të deputetit Saimir Tahiri, në vijim të një hetimi të nisur për veprat penale të “Trafikut të narkotikëve”, kryer në bashkëpunim, në formën e posaçme të grupit të strukturuar kriminal dhe “Korrupsionit pasiv të zyrtarë të lartë shtetërore dhe të zgjedhurve vendorë”, parashikuara nga nenet 283/a/2 dhe 260 të Kodit Penal.
Kjo kërkesë vjen pas përfshirjes së Saimir Tahirit në dosjen “Habilaj”, ku deputeti dyshohet si i përfshirë në trafikun e drogës.
Prokuroria për Krime të Rënda po zhvillon hetime, në bashkëpunim me autoritetet italiane.
