Ministri i Financave dhe i Ekonomisë, Arben Ahmetaj deklaroi sot se futja e biznesit të vogël në skemën e pagesës së TVSH nuk do të ndikojë në rritjen e çmimeve.
Sipas Ahmetajt, çmimet i përcakton tregu, ndërkohë që procesi taksimit të biznesit të vogël do të strukturojë kontrollin ndaj bizneseve të mëdha me qëllim evitimin e evazionit fiskal.
Ahmetaj zhvilloi sot një takim me përfaqësues të 100 bizneseve të vogla në ambientet e kryeministrisë, ku tha:
“Qëllimi është të mos lejojmë biznesin e madh që të mos raportojë të ardhurat. Nuk do të ketë rritje çmimesh, pasi nuk ndikon TVSH-ja, por ato i vendos tregu. Në konkurrencën e drejtë, çmimet reflektojnë të gjitha kostot qoftë ato administrative apo edhe ato fiskale. Çmimet kanë ndjekur rritjen dhe uljen e tyre normale me inflacion 1.5 deri në 2 përqind”.
Gjithashtu, gjatë fjalës së tij, Ahmetaj përmendi kategoritë që përjashtohen nga skema e TVSH-së:
“Ambulantët do të jenë të përjashtuar nga TVSH. Ai që shet fruta-perime nuk është pjesë e detyrimit. Ne jemi fokusuar tek biznesi i madh. Do të jemi sërish këtu pas disa muajsh për të parë se çmimet nuk u rritën dhe kostoja nuk u rrit.
Fermerët e formalizuar që janë rreth 30 mijë fermerë të pajisur me NIPT që funksionojnë me shitje tek shumica, u rimbursohet TVSH-ja dhe nuk do të kenë detyrim të jenë pjesë e deklarimeve të tjera”.
Ahmetaj theksoi “po thjeshtëzojmë proceduarat për dokumentet që duhen dhe nuk do keni nevojë për të paraqitur 6 tipologji. Sot deklarimi i të dhënave është mekanizëm i detyruar dhe mund të bëhet online. Ky detyrim është për të gjithë ata persona që kanë të ardhura mbi 2 milionë lekë”.
Biznesi i vogël, vijoi ai, që i referohet zejtarisë, berberëve, këpucarëve, ata që shesin fruta perime do jenë të përjashtuar nga taksimi i TVSH. “Gjithashtu edhe ata që janë ambulantë nuk do përfshihen në skemën e TVSH. Ne jemi fokusuar tek biznesi i madh”, tha Ahmetaj.
Ministri foli edhe një herë për shmangien e dokumenteve të shumta për biznesin:
“Do të shmangen një numër i madh dokumentesh, nuk do të paraqiten 6 tipologji dokumentesh në zyrat e administratës tatimore, gjë që ua bën më të lehtë procedurat sipërmarrjes.”
