Kryetarja e Lëvizjes Socialiste për Integrim, Monika Kryemadhi theksoi pas tryezës së Frontit opozitar (PD+LSI dhe partitë e tjera opozitare) se i duhet dhënë fund shtetit banditesk të kryeministrit Rama, nisur nga skandali i ditëve të fundit, ku ish-ministri i Brendshëm Saimir Tahiri, del i përfshirë në trafikun e drogës Shqipëri-Itali.
Në një prononcim për mediat, Kryemadhi saktësoi se tashmë opozita është bërë në një front për të dërguar në shtëpi Edi Ramën, pasi qytetarët po ndihen gjithnjë e më shumë të kërcënuar nga bandat dhe shtetit i kapur prej tyre.
“Qytetarët shqiptarë gjenden të kërcënuar nga bandat. Tryeza ishte një sinjal shumë i mirë për të gjithë qytetarët dhe opinionin publik. Ky front do të nisë të gjithë angazhimin e tij për të pasur një aksion politik dhe një luftë ndaj narkoshtetit që përfaqësohet dhe drejtohet nga kryeministri Edi Rama. Të gjitha partitë janë të shqetësuara për situatën që po kalon vendi. Inkriminimi i çdo strukture shtetit, i policisë, inkriminimi i njerëzve, njerëzit nuk kanë më besim dhe kjo ka inkriminuar edhe vetë besimin e qytetarëve ndaj shtetit”, u shpreh Kryemadhi.
E pyetur nëse aksioni opozitar do të përmbajë në agjendën e tij edhe protestat kryetarja e LSI-së ia adresoi këtë përgjegjësi qytetarëve, të cilës sipas saj, duhet ta ndiejnë si detyrim pë të protestuar kundër qeverisë së kapur nga krimi. Kryemadhi la të kuptohet se opozita ende nuk është e përgatitur për të zhvilluar protesta masive ndaj përfshirjes së qeverisë në trafikun e drogës. Megjithatë, sipas saj, ka ardhur koha për t’i dhënë fund tranzicionit shqiptar.
“Kjo është një kambanë jo vetëm për klasën politike, por për gjithë shoqërinë shqiptare. Kjo ishte tryeza e parë, e cila do të pasohet nga të tjera. Ngjarjet e fundit treguan ato që kemi artikuluar prej kohësh. Ashtu si opozita, ashtu si edhe ne, kemi arritur në një pikë të përbashkët. Tani sa i përket protestave, ato vijnë nga populli. Janë qytetarët që ta ndiejë së brendshmi protestën. Ndërsa ky do të jetë fronti më inspirues në Shqipëri, pasi e kemi mundësinë që të gjithë së bashku për t’i dhënë fund këtij tranzicioni të stërzgjatur. Ka ardhur momenti që të bëjmë një gjë të mirë për Shqipërinë”, përfundoi Kryemadhi.
