Ministri i Brendshëm, Fatmir Xhafaj ka lëshuar alarmin se policia nuk po arrin të arrestojë autorët e bandave kriminale që qarkullojnë në qytete të ndryshme të Shqipërisë. Duke folur me drejtuesit vendorë të Vlorës, Xhafaj vuri në dukje se edhe pse në këtë qytet është rritur siguria, strukturat e policisë lënë për të dëshiruar.
Xhafaj iu referua edhe ngjarjeve të fundit të ndodhura në Elbasan, ku u godit makina e policisë, dhe ngjarjes së Lushnjës, ku tre ditë më parë pas një atentati me armë zjarri humbën jetën Jurgen Hoxha dhe Zamir Latifi. Ata njihen si miqtë e ngushtë të Xhulio Shkurtit, djali i vëllait të Aldo Bares (Alfred Shkurtit).
Sipas Xhafajt, është e papranishme që shumë ngjarje të tilla ende nuk janë zbardhur nga policia, e cila sipas tij, po tregohet e paaftë për të arrestuar autorët.
“Ne mbetemi të shqetësuar se përtej kësaj pamje të përgjithshme pozitive që ka në qark dhe në mënyrë të veçantë këtu në qytetin e Vlorës dhe që janë hapa pozitiv, konstatojmë disa dukuri që kanë të bëjnë me mungesën e eficencës nga strukturat e policisë. Është e papranueshme fakti që vetëm gjatë këtij viti janë 5-6 ngjarje të rënda, vrasje me viktima dhe jetë të pafajshme qytetarësh dhe zbulimi i autorëve lë shumë për të dëshiruar, për të mos thënë që për ne është jashtëzakonisht shqetësues. Gjë që do na detyrojë të bëjmë një analizë më të thellë me forcat e policisë dhe duhet të jetë e nevojshme për të bërë edhe ndryshimet edhe përmirësimet e duhura, qoftë në përbërje të tyre qoftë në drejtimin e tyre, por është shumë e rëndësishme këtu për të theksuar edhe një komponent të ri”, u shpreh Xhafaj.
Për këtë arsye, sipas tij përveç reformës që do të duhet të kryhet në strukturat e policisë, një rol të rëndësishëm ka edhe bashkëpunimi me komunitetin dhe drejtuesit e qeverisjes vendore.
“Një marrëdhënie të re që duhet ndërtuar ndërmjet organeve të qeverisjes vendore dhe strukturave të policisë. Policisë dhe komunitetit. Këtu është përgjegjësia jonë dhe së bashku me organet e qeverisjes vendore dhe organe të tjera përfaqësuese në territor bëjmë kthesën e duhur, në mënyrë që të kemi mundësi të ndërtojmë një marrëdhënie krejtësisht të re, ndërmjet strukturave të policisë dhe organeve të qeverisjes vendore”, përfundoi Xhafaj.
https://www.facebook.com/edirama.al/videos/10155224226961523/
