Pas replikave të shpeshta publike, duket se presidentit të SHBA-ve i është sosur durimi.
Donald Trump ka deklaruar se marrëveshjet kanë rezultuar shpesh të pavlera, prandaj vetëm një gjë do të funksionojë për Korenë e Veriut.
“Presidentët dhe administratat e tyre kanë folur me Korën e Veriut për 25 vjet. Janë arritur marrëveshje dhe janë paguar shuma të mëdha parash.
Kjo nuk ka funksionuar, marrëveshjet janë shkelur përpara se të thahej boja, duke i bërë të duken si palaço negociatorët e SHBA. Më vjen keq, por vetëm një gjë do të funksionojë!”, shkruan presidenti Trump në Twitter.
Ky ka qenë paralajmërimi i Trump, ndërsa nuk dha detaje se kujt i referohej, duke lënë hapësirë për aludime të ndryshme.
Nuk dihet nëse SHBA ka ndërmend të kryejë një aksion ushtarak kundër Kim Jong Un, ndërsa replikat mes dy liderëve kanë qenë mjaft të ashpra, deri në kërcënime për shkatërrim.
