Novelisti i natyralizuar britanik me origjinë japoneze Kazuo Ishiguro ka fituar çmimin Nobel në Letërsi. Akademia suedeze zgjodhi këtë të enjte pikërisht Ishiguro si fituesin e çmimit Nobel të letërsisë për vitin 2017 për forcën e madhe emocionale, që shprehin romanet e tij, të cilat thuhet se kanë zbuluar humnerën përtej ndjenjës sonë të lidhjes me botën.
Fitorja e çmimit Nobel nga shkrimtari me origjinë japoneze ka habitur jo pak, teksa në garë ishin shkrimtarë si Margaret Atwood, Ngugi Wa Thiong’o dhe Haruki Murakami, ky i fundit një prej shkrimtarëve të njohur japonezë që prej vitesh është në listën e kandidatëve të Nobelit.
Emri i Ishiguros nuk figuron në asnjë prej kandidatëve pretendentë për këtë çmim. Ai e la Japoninë në vitin 1960 në moshën 5 vjeçare dhe u kthye për ta vizituar vetëm 30 vite më vonë në vitin 1989.
Në fund të viteve 1970, Ishiguro u diplomua në Anglisht dhe Filozofi në Universitetin e Kent dhe më pas vazhdoi studimet për Shkrim Kreativ në një universitet në Jug të Anglisë.
Libri i tij i parë është botuar në 1982, i titulluar “Një vështrim i zbehtë i kodrave” (A Pale View of Hills). Ishiguro është një nga autorët më të njohur të trillimit bashkëkohor në botën angleze, pasi ka marrë katër nominime për Man Booker Award dhe e ka fituar këtë çmim në vitin 1989 për romanin e tij “The Remains of the Day”.
Në vitin 2008, The Times e rendit Ishiguron të 32-in në listën e “50 shkrimtarëve më të mëdhenj britanikë që nga viti 1945”. Romani i tij i shtatë, “The Giant Buried”, u botua më 3 mars 2015 në Shtetet e Bashkuara dhe në Mbretërinë e Bashkuar.
Në një intervistë të bërë me Kenzaburo Oe ai ka treguar ndikimin e emrave të njohur të letërsisë japoneze në letërsinë e tij.
